theme-sticky-logo-alt
theme-logo-alt

Kut noh ka khang chnong ka Iawmusiang, daw thoh cha ka sorkar yow noh biang yei jhep ha Mynkjai

I khang chnong ka Dorbar Chnong Tympang Iawmusiang iwa ar sngi da poi i chawa kut ynne ka sngi wei ini i khang chnong da man i iwa jop heiwa ki dukan dukdoh da man ki kiwa khang kamjooh leh ki skur. 

Ynne i sngi da sakhi wa ki khon ka chnong da yieñ ki ha ki bynta wa psiah chapoh u pood ka chnong wei da pynuiñ ki ya waroh ki kari kiwa thmu wow psiah chapoh ka chnong wei kamwa man ynnnin da pynman leh yei pynkhooid ya ki rood sarok ka chnong. 

Hadien wa kut ini i khang chnong da yoh wow yaklam wa kiwa kitkaam ka chnong wei neiliang u waheh chnong ka Tympang Iawmusiang, u Ajoy Lywait da pyntip u wa i khang chnong da man iwa jop khlem iwon iwon i jia wa sñiawsih deiwa e khublei leh ya ki paidbah khamtam kiwa chong dukan, ki seiñ yaw, ki seiñbhalang kiwa da emlang ha ini i bynta. 

Da ong u leh wa ki paidbah kiwa da chah ktah ha ini i khang chnong ymtoh u sñiawpher ki neibhah yeini da leh neibynta i bha i miat wow yoh noh ya i thaw noh-jhep iwa paka neibynta ka sor Jowai.

Chooh chooh da pyntip u wa neiliang ka chnong da pynman ko ya ka yalang ynne heiwa da rai wa mynstep heipor 8:30 daw mih paidbah biang ki wow pynsñiawthooh cha kiwa chongdai wa ymtoh u nohroi ki ya i jhep hadien wa dadep chongdai ki chwa wow liwan ki cha yung khamtam haphrang ka yung krehkaam u Deputy Commissioner ka West Jaiñtia Hills. 

Neiliang u Rupaia Lamar uwa man u Executive Member ka chnong da ban u wa kiwa chongdai emkaam u bahkhlieh ki ya jar jiar ki thaw wa chongdai ki wow man kiwa khooid heipor wa chong wei hadien wa liwan yung ki. 

“Kani ka yaw toh ka pliang-ja wei ymtoh ka thaw noh-jhep, katwa kamtæ kamwa da chem i yeiwa jia da em hok wow dawa wow booh noh da ki kari wow noh ya i jhep ha ki thaw wa jooh lang ki jhep,” da ong u Rupaia Lamar.

Heijooh i por da ong u wa ki chnong ha thaaiñ Mynkjai kiwa da pyrchah yei noh-jhep tangwa manda khut ka Meghalaya High Court da ong ki wa ym em de pyrchah ki (yei noh jhep), kamtæ mih i kylli wa weileh ym noh yei jhep biang ha i jooh i thaw (Mynkjai) wei neiliang ka chnong da rai ko ynne wow thoh noh cha ka Chief Secretary ka jylla wow pynmih ya ka hukum wow noh biang ha i jooh i thaw deiwa bood ya ki kyndon noh jhep. 

Share this:
Previous

Ka Assam wa em rap boon ki Map wa ki kot ki sla bar ya ka Meghalaya: Conrad

Next

Ym pu kut i yaklam wow kyrriah ya kiwa sah ha Them Metor wa ktah ko wot cha baar ka jylla