Hadien i pdung wa yoo chyrkhei lakam wa pdung Bomb iwa da jia ynnin ka sngi ha kawi ka yung ha ka chnong Lumkynsai, Smit neiliang ki pulit da thung ki da ka Special Investigating Team (SIT) yow tip yei daw wa da jia ini.
Neiliang u Superintendent of Police ka East Khasi Hills, u Sylvester Nongtnger da khana u wa ya ka SIT daw khlieh da u SP (City), u Vivek Syiem wei heijooh i por u SP da khana u wa ynne ka sngi ki pulit ki da booh noh ki da ka Suo Moto Case hajrong itai i jia hapoh ka Madanrting Police Station.
Hawa kylli yei yi wa da jia, neiliang u SP da kyntait u wow khana iyi iyi kat hadooh wa da dep ka takit da ka SIT.
Kam wow pynkynmoo wa uwi u bru wa tip kam u Pynsuklang Khongwir (38 snem) da khlaad ha ini i yung neiwa pdung uwa man leh kam uwa thiah kjut iwa da jia heipor pyrdi sngi.
Da pyntip leh wa neidaw wa ini i pdung toh iwa joor bha hadooh wa i doh i pran uwa khlaad da pra da tkut i phrai, wei ki yit yong katai ka yung da piah wei kamjooh ki kamra ki kamra leh da sih ki.
Tangwa hadooh katni neiliang ki pulit dang kyntait ki wow khana lada i pdung toh u kynja Bomb lane toh wa pdung ka Electric Mattress kamwa da pynbaad.
Puræ leh: Uwa khlaad nei pdung hapoh i yung toh uwa thiah kjut
