U General Secretary ka United Democratic Party (UDP), u Dr. Jemino Mawthoh da ong u wa hadien wa mih i pyrchah na ki paidbah wa chah ktah ha khappood, ka Party da pynsñiaw ko ha ka sorkar wa emkaam wow pait bniah biang ya ka soskular sñiawthooh yumut namo ka Memorandum of Understanding (MoU) yow pynbait pood wa da yasoi hapyrdi ka sorkar Meghalaya wa Assam ha nongbah Delhi.
Da ong u wa ka ya kajia pood toh ka kaam kawa da lai slem bha, deiwa pynsñiaw wa dang em sa 6 tylli ki thaw kiwa dang hap wow pynbait, wei pynrap u wa lada nawa sdang da mih moochynthut daw ktah chiboon wow pynbait ya ki 6 tylli kiwi won ki thaw wa ya kajia ha ka bhah wa ar.
Ha ka yalang ka MDA Co-ordination Committee ha kani ka tayaw, u Chairman ka Committee uwa man leh u Montri Rangbah ka jylla, u Conrad K Sangma da khana u wa ki seiñ saiñpyrthai kiwa emlang ha ka sorkar ym em da pynsñiaw ki yei dawa wa toh u bichaar namo wow pait biang ya ka MoU. Katwa neiliang ki MDC ka UDP ha KHADC lyngba ka Boundary Committee da rai ki wow kyrchaan ya ki tre thaw wa ki khlieh synchaar wow ujor noh hapoh kasari neidaw wym hun ya ka MoU.
Hawa kylli hajrong ini, u Jemino da pynsñiaw u wa ym ye wow ong iyi iyi hawa yatoh wa ini i wym bien klam ha ka MDA Co-ordination Committee hajrong ka MoU, neibhah wym emlang u ha katai ka yalang. Tangwa da khana u wa neiliang yong oo kam uwa yahkhmat ka Party dadep u wow yaklam wa toh u pait biang hajrong kitu ki thaw wa em i pyrchah.
Da khana u leh wa da yaklam hajrong i ong u Chief Executive Member ka KHADC, uwa da pynsñiaw yei emkaam wow bichaar biang ya kitu ki thaw wa chah ktah ha i pynbait pood. Da ong u wa katni chong sa ha ka National People’s Party kawa yahkhmat ya ka sorkar wow burom ko ya itæ iwa da pynsñiaw.
Hawa kylli chooh chooh, u Jemino da ong u wa ye wow em itæ i yaphær yumut hapyrdi ki MLA wa ki MDC hawa yatoh wa i pynbait pood, tangwa hawa khaddooh toh u yieñ i e yumut yong ka Party.
