U Vincent H Pala uwa man leh kam u President ka MPCC ynne ka sngi da ong u wa ka Party da dap pura ko wei da man ko kawa yatylli heiwa da em i yakrehlang. Da ong u wa em kiwa kam wa da yut ki bru na ka Party tangwa itæ toh hawa sdang donhi neibhah wa ye u em i sñiawthooh bakla tangwa katni wot u Mukul wa oo (Vincent) da man ki kiwa kreh lang wa kiwa kreh chitom.
Heiyatoh wa ka Election chiteiñ samoi ha ki le Constituency, u Vincent da ong u wa lada ki Election u man ki kamwa toh u man wei ym toh kiwa phylla, ka Congress u jop ko wei da sñiawskem u leh wa daw jop ka Congress ha waroh ki le Constituency wa daw yakhun ko.
Da ong u wa da lai u cha ki yalang Election wa hap pynman da kiwa khian na Mawphlang wa Mawryngkneng neidaw u COVID-19 wei ki paidbah da em ki wa ka Congress deiwa ban wa ki heh ka Congress da phiah ya ki wow lai yalang cha Ri-loom Garo wa Ri-loom Khasi.
U Vincent da khana u wa heiyatoh wa ka Rajabala da pait da u Marthon Sangma wa ka Deborah Marak, ha Mawryngkneng ka Ampareen Lyngdoh wa u Pynshngain N. Syiem katwa ha Mawphlang won u Charles Marngar wa u Kimfa Marbaniang.
Kam wow pynkynmoo heini, ha kani ka Election chiteiñ samoi ka Congress da pynyieñ ko ya u Highlander Kharmalki na Mawrynkneng, u Kennedy Khyriem na Mawphlang wa ka Hashina Yasmin Mondal na Rajabala.
Hadien wa pdiang biang ya ki heh warim ka Party cha ka Congress, u Vincent da ong u wa toh u pdiang dkhot chooh ha ki sngi wow wan tangwa manda pdiang ya ki dkhot emkaam u yoh bor na ka High Command, tangwa nei em ka Election chiteiñ samoi ymye u wow lai yaklam ya ini cha Delhi wei du hadien ka Election daw psiah biang ki bru cha ka Party.
“Ym toh de wow phylla wa manda sdang u snem thymme wow yoo ya i psiah chapoh ka Party,” da ong u Vincent.
