U Superintendent of Police ka East Khasi Hils, u Sylvester Nongtnger ynne ka sngi da pyntip u wa i ya kajia wa mih ha ka 21 tarik ha Golflink iwa da wanrah ya i mynsoo ki 3 ngut kiwa na ka chnong Wahkaji, ym toh iwa leh da ki bru na baar jylla.
Da pyntip u wa i takit ki pulit wa kiwa sakhi ya itai i jia, da khana wa ki bru kiwa emkti wow dat pynmynsoo ya ki 3 ngut toh kiwa na kani ka jylla, heiwa ye wow sñiawthooh na i ktien wa i rukom klam. Da ong u leh wa ini i jia ym em iwon iwon i daw pynyaphær jaitbru neibhah ini toh iwa da jia hadien wa da dep ya dih sñiawbha.
Da pyntip wa ha ka 21 tarik ha i por 10:45 i miet, ki pulit ka Pasteur Beat House da yoh yutip ki wa em ar ngut kiwa da mynsoo wei thiah yapler ha Golflink, heiwa da pynkit noh wut wut cha Shillong Civil Hospital.
Katkam i pyntip u SP, ha katai ka sngi da em ki khynnah kiwa lai yalehke ha Golflink, wei manda dep, em ki kattu katni kiwa da neh chongke ha katai ka thaw wow ya baam ya dih, wei ha itai i por da wanpoi sa kawi ka kynhun kawa lai dih sñiawbha ha katai ka thaw wei hadien da mih i ya kynaad hapyrdi kitai ki ar liang. Da pyntip u leh wa hadien wa da ya suk kitai ki ar liang, da wan mih sa kawi ka kynhun kiwa da kawang da ki klong ya kitai ki khynnah wei hadien kattu katni por da chem ya ki khynnah kiwa da mynsoo.
Da pyntip leh wa neiling u pa yong uwi na kitai ki khynnah da ujor u harjong itai i jia wei ka takit katni dang lai ko.
