Shillong: U Montri Rangbah ka jylla, u Dr. Mukul Sangma da ong u wa ki seiñ saiñ pyrthai ymtoh u chim kabu ki ya ka kaam kajia pood wa ka jylla Assam wei emkaam wow kiar ki na i kwah yohnong ki samen neibhah ini daw pynchitom ki ya ki paidbah ki thaiñ khappood.
“Ym emkaam wow pynman kaam saiñ hima ka kaam khappood wa ka Assam neibhah lada leh i kamni daw pynchitom ko ya ki paidbah ka thaiñ khappood” da ong u Dr. Mukul.
Da ong u wa i pynbaad ka Assam wa ka Meghalaya da tia pood ko cha Assam man ko ka wym yahaap neibhah wym poi ko cheiwon cheiwon leh wei emkaam chwa wow yaklam sñiawthooh wow pynbait yeini waroh arliang.
Da pyntip u wa neiliang ka sorkar Meghalaya da dep rai ko wow rah yeini cha ka sorkar pyrdi tangwa neiliang ka Assam da kyntait ko yeini.
“Da yaklam i yeini boonsien wa ka Assam nadooh ka kyrdan u Montri Rangbah hadooh ka kyrdan u Chief Secretary wei man ko i kaamram ka Assam wow raikut wei wow yieñ wow pynbait noh ya kani ka kaam” da ong u.
Da pyntip u leh wa dadep phah ya ki kot ki sla cha ka Assam tangwa neiliang yong ka dang paan por bait ko hadooh katni yow bichaar ya kini waroh.
Da ong u wa iwa kongsan toh wa kini ki ar tylli ki jylla, toh u yaklam ki markhmat yow pynbait ya ini i kaam wa dang sahteiñ.
Discussion about this post