U Manjinder Singh Sirsa, uwa man u President ka Delhi Sikh Gurdwara Management Committee da ong u wa katkam ka hukum yong ka High Court, ka sorkar ym ye ko wow sai yabor ya ki bru na Themmetor ‘Sweepers Colony’ hanla man ki kiwa chong pyrchah aiñ, tangwa ka Kachari da phah ko ya ka sorkar wow yaleh da ka mukotduma Civil Suit, wei uwa bichaar toh u ap u ya waroh arliang wei hadien itæ daw pynmih ya ka hukum.
Ka kynhun ki jaitbru Sikh ynne ka sngi da yachem ki wa u Lat ka jylla Meghalaya, u Satya Pal Malik wow pyrchah ya i thmu wa i rai yong ka sorkar Meghalaya wow kyrriah noh ya waroh ki bru kiwa sah ha Themmetor kawa em ha Iewmawlong.
Hawa klam wa ki laad pathai khubor, u Sirsa da ong u wa ha i yachem wa u Lat wei da pynyoo leh ya ki kot ki sla wa em ki neibynta katai ka thaw, wei kamjooh ya ka hukum yong ka High Court ka Meghalaya kawa klam che wa hanla ki bru chong ki pyrchah ya ka aiñ leh ha katai ka thaw, ym ye ki wow chah kyrriah yabor.
Da pyntip u wa neiliang u Lat ka jylla da kular u wym em i kyrriah yabor ya ki bru kiwa sah ha Themmetor, tangwa daw lai bait katkam ka aiñ deiwa bood leh ya ka hukum wa da pynmih da ka High Court.
Da ong u wa ha u snem 2008 neiliang u Syiem ka Hima Mylliem da ong wa ya katai ka thaw da e cha ka Harijan Panchayat Committee, wei katni won kammon ka sorkar da ong ko wa da dep soi ya ka Tripartite Agreement, wei daw chim noh ya katai ka thaw, deiwa pynsñiaw wa ini i kaam ym em ha ka aiñ. Da kyntu u ya ka sorkar wa ya ki paidbah ka jylla wa ki Sikh ha Meghalaya wa ki toh kiwa khian paaid bha, wei ki ym toh u chah kyrriah ki khlem da bood ya ka aiñ.
U Sirsa da pynbaad u leh wa ka sorkar jylla ym pu jooh ya phyllu yumut ko wa ki bru kiwa sah ha Themmetor, wei kammon rai hi-eh wa katai ka thaw toh ka yong sorkar wei wow kam ha ki laad pathai khubor wow kyrriah noh ya ki bru na katai ka thaw du hapoh chi tayaw, heiwa da pynbaad leh wa ka rai wa da chim da ka kynhun montri (Cabinet) man ko pyrchah ya ka aiñ neibhah wa pynkheiñ ko ya ka hukum yong ka Kachari.
Uwa yahkhmat ki Sikh uwa da wan na Delhi da ong u wa ki bru wa em ha Themmetor ym kwah ki wow mih na katai ka thaw, deiwa pynrap wa lada em kawon kawon ka soskular, ka sorkar da toh wow yaklam lang wa ki bru na katai ka thaw hachwa wow rai wa hap u kyrriah, khnang wa ki bru katai ka thaw u chong pyrkhat lang wow chim ya ka rai. Da pynbaad u wa hadooh katni ka sorkar ym pu em khut yaklam wa ki bru na katai ka thaw.
Da pynbaad leh wa ka High Level Committee da lai ko palat pood, deiwa ong leh wa ka HLC ym em bor ko iyi iyi lait noh du wow e yumut wei wow rah biang ha Kachari, wei da pynbaad chooh chooh wa ka sorkar ka kwah ko wow pynsñiaw yaphær jaitbru neibynta wow yoh nong ha ka Election.
Da ong leh wa man ko iwa lyngngoh wa ka sorkar Meghalaya ym em pynyoo næ e ko cha ki bru katai ka thaw ya ka bui (Report) yong ka ka HLC næ ya ka soskular wa da soi wa ka Hima Mylliem, wei da pynbaad wa ini i leh ye wow em iyi re iyi cha kylla.
U Sirsa da ong chooh chooh wa kam ka kynhun daw lai wow rah biang ya kani phang hakhmat ka Kashari wei kamjooh hakhmat u Union Home Minister ka ri India.
