U MLA ka UDP uwa man leh u montri ka sorkar jylla, u Lahkmen Rymbui da ong u wa ym ye wow pdiang wa ki Company saam bordiñ u khyrwait chabi ki katwa ngait ya ka sorkar, lada toh na ka sorkar India lyngba ka National Thermal Power Corporation (NTPC) næ ka North Eastern Electric Power Corporation (NEEPCO).
U Lahkmen da ong u wa u montri rangbah ka jylla, u Conrad K Sangma toh u chimkhia bha u ya ini i leh ki Company neibhah ym ye ki wow khyrwait chabi ya ka sorkar hawa yoo ko wa ka sorkar thmu ko wow su cha waroh naka ram wa yoh wa T. 1345 klur, deiwa pynrap wa lada ka sorkar ym thmu ko wow su weileh won u chim ko ya ka ram.
Da ong chooh chooh u wa ka sorkar India dadep e ko ya ka ram kawa T. 1345 klur wow su cha ki Company saam bordiñ, wei ka sorkar jylla hadien wa yoh ya ka poisa ha ka kylla wa nyngkong da dep su chwa cha ki Company katwa dap.
Heiyatoh wa i pynbaad wa tkoh i krehkaam ka MeECL, neiliang u Lahkmen da pynksan u wa ka chnat bordiñ da pyrchang ko wow pynbait ya i eh i khoo wei ha ki 3 snem wa dadep, da thung leh boon ngut ki CMD ha ka MeECL nadooh ki sahep kiwa da chemphang ha ki kyrdan wa heh hadooh ki IAS kiwa dang rap khynnah, wei ini i leh ka sorkar pynyoo i wa da thooh ya ki laad wow leh yeiwa bha tam neibynta ka chnat.