Ka seiñ Federation of Khasi Jaiñtia & Garo People (FKJGP) East Jaiñtia Hills District dap ko dei sñiawkhia wa khroo heiwa u sarok NH06 da sih u chawa palat heiwa wym yahaap kyrdan wow ong de toh u sarok National Highway.
Neiliang kiwa yahkhmat ka seiñ hapoh i yahkhmat u MC Suting, President hei emlang wa u DH Sumer, General Secretary kamjooh wa u E. Sutnga, Joint Secretary da lai li booh ki da ka dorkhat ha u Abhilash Baranwal, Deputy Commissioner ka East Jaiñtia Hills District wow kyrpaad ya oo kam u khlieh ka District wow chimkhia u chna pynbha ya ki yingkieñ wa em ha tymbud uni u sarok nadooh Lumshnong ter ter chadooh Sonapur heiwa i sih wei jæd u surok da man ki ki cha palat.
Kamtæ heiyatoh wa kani ka phang da ban joor wa ki yingkieñ da yoo chong synjor bha ki rukom man ki heiwa ym tip heiwon i por u tkut lane u kheiñ ki iwa daw booh hei eh yei lai i wan ki paidbah hapoh District wa kamjooh kiwa wan na baar ka jylla.
Heiyatoh wa kani ka phang da ong wa ka sorkar Meghalaya toh u chimkhia bha ko yeini wei toh u pynchitom ya ka NHAI yei leh habra wow chna kamjooh u pynchna ya uni u sarokbah neibhah kamwa man katni da yoo la kam u surok pohchnong.
Hei yaklam wa u Deputy Commissioner da ong u wa neiliang yong oo da chimkhia bha u wei da pyrchang u leh boonsien u yaklam wa ka NHAI, tangwa neiliang yong ka NHAI ym kheiñ snep ko yeini wei oo kam u khlieh yong ka District da kwah u yoo yei roi i paar hapoh da District, da kular u wow chimkhia yeini i kaam wow yaklam biang wa ka NHAI wei lada ym chimkhia ki neiliang yong oo daw leh u yeiwa emkaam.
Kamtæ ka seiñ da kyrpaad joor ko ya u Deputy Commissioner wow leh u yeiwa emkaam neibynta i bha i miat, i roi i paar yong ki paidbah.
