Ka Khasi Students’ Union NEHU Unit da dawa ko na ki bor ka skurbah North Eastern Hill University (NEHU) wow dam u ktah ya ka bhah yong ki khynnah wa toh hok wow yoh u psiah wow puræ ha kani ka skurbah hanla pynkrehkaam ya ka Common University Entrance Test (CUET).
U Banlumlang Rani, President ka KSU (NEHU Unit) da ong u wa hanla ha kiwi ki thaw puræ da pynlait ya ki khynnah na ka Exam CUET, tangwa wow lai puræ ya ka Post Graduate (PG) ha NEHU hap yakhun ya kani ka Exam.
Da ong u wa ka seiñ ym pyrchah næ kyrchaan ya i pynkrehkaam ya ka CUET, tangwa da klam che ya kiwa pynlai wa lada pynman ya kani ka Exam leh ymtoh u ktah ko ya ka bhah ki tre jylla, khnang wa ki khynnah u yoh ki wow psiah puræ ha kani ka skurbah, neibhah ya ka NEHU da wanrah wow kyntu kynrong ya i puræ puthi ki paidbah ri-loom ka thaaiñ wa ki tre ri.
Hawa kylli, u Banlumlang da pyntip u wa ha ki snem wa da dep ka bhah puræ (Seat) man ko mar 50% ya ki jaitbru ri-loom wa kiwi ki jaitbru, wei ka bhah kyrpang ya ki tre jylla kamwa 5% katkam ki thaw wa wan ki hajrong kiwi ki bhah wa toh wow yoh.
Ha iwi i liang, ki khynnah ka skurbah da klam che ki leh wa ym pu pdiang ya i thmu wow wanrah ya ka ktien ‘Japanese’ wow puræ ha kani ka skurbah.
U Banlumlang da ong u wa ka KSU ym pyrchah ko yeini i thmu, tangwa chwa wow wanrah ya kani ka Subject ka NEHU toh u pynbiang chwa ko ya kiwi iwa emkaam wa jhan ha kani ka skurbah, deiwa pynrap wa ka sorkar jylla da toh u kyntu ko ya ka sorkar pyrdi wow kyrpaad chwa yeiwa ka NEHU ympu em ko hadooh katni.
