Ka Bharatiya Janata Party (BJP) Meghalaya da pynsñiaw ko wow yang bait yeiwa phah da kiwa yahkhmat wa haneiñ lada hap wow dam noh u kyrchaan ya ka sorkar MDA wa yahkhmat da ka NPP.
U President ka BJP, u Ernest Mawrie da khana u ha ka yalang kawa man ha ka 25 tarik yong u bnai wa da dep, da em ki dkhot ka Party kiwa da e yumut wow dam noh u kyrchaan ya ka sorkar MDA, tangwa da ong wa neiliang ka Party ka sñiaw ko wa ini i kaam toh wow chim rai bait da kiwa yahkhmat wa haneiñ ka Party na Delhi.
Da pyntip u leh wa ya ini i kaam daw yaklam biang ha ka yalang National Executive kawa daw man ha Hyderabad. Hawa yatoh wa i klam yong ki 2 ngut ki MLA ka Party, da ong u wa ki MLA leh hap ki wow yang yei rai na Delhi.
Hajrong i pynbaad ka Congress wa da piah neibhah uwi u MLA ka BJP da kynthah u ya ka sorkar katwa uwi won da yaroh, neiliang u Mawrie da ong u wa ka BJP da jop ko ya ka thong wow pynlait ya ka India nei synchaar yong ka Congress, wei i klam yong u President ka MPCC, u Vincent H Pala toh i klam samen yong oo.
