Ynne ka sngi ka 26 u Naiynñiaw yong u snem 1999 man ko ka sngi wow sah kynmoo ya ka ri India waroh kawi neibhah man ko ka sngi kawa tip leh kam ka Kargil Vijay Diwas heiwa ka India da jop ko ya ka thma Kargil pyrchah ya ka Pakistan deiwa yoh biang u knieh ya ki thaw ka ri na ki chipai Pakistan.
Kam wow pynkynmoo heini, kani ka thma toh kawa da yaleh hapyrdi kini ki ar ri kawa da sdang hadien wa ki chipai ka Pakistan wa ki damok (Terrorist) wa kyrchaan ko da sdang psiah tooh ki chapoh u pood ka India ha ki thaaiñ Kargil hawa sdang u Naisan 1999, wei kani ka thma da neh ko da ki bnai heiwa da em 527 ngut ki chipai India kiwa khlaad katwa ki chipai ka Pakistan da antaad wa em ki palat 700 ngut.
Kani ka thma da poi ko chawa kut ha ka 26 Naiynñiaw 1999 hadien wa da randien lut ki chipai ka Pakistan wei ki chipai India leh da yoh biang ki wow knieh lut ya ki thaw wa da chimkti ka Pakistan ha kani ka thma.
Kamtæ ka 26 u Naiynñiaw man ko kam ka sngi wow tip noh kam ka Kargil Vijay Diwas namo ka sngi wa jop ya ka thma Kargil.
Ynne ka sngi ka ri waroh kawi da kynmoowarom ko ya kani ka sngi wa yaki chipai kiwa da khlaad kamjooh leh kiwa da embynta ha kani ka thma nadooh ki chipai ka Indian Army, Indian Air Force wa kiwi kiwi.
Neiliang u montri rangbahdooh ka ri, u Narendra Modi ynne ka sngi da ong u wa ynne ka sngi toh u kynmoo ya i chlur wei raikut mynsien ki chipai wow yada ya ka ri ha u snem 1999 wei ini i man yong ki daw e mynsien i ya ka mynried wow wan.
U Montri Yada Ri, u Rajnath Singh, u CDS General Bipin Rawat, COAS General M M Naravane, u CNS Admiral Karambir Singh wa u CAS Air Chief Marshal RKS Bhadauria da lai booh syntu ki ha ka National War Memorial ha nongbah New Delhi.
U Conrad Sangma, uwa man u montri rangbah ka jylla, da ong u wa ynne ka sngi man ko ka lyngkhooh snem wa 21 yong ka Kargil Vijay Diwas, kynmoowarom i ya ki chipai kiwa da yaleh hadooh wa jop ha kani ka thma.
Heijooh i por da kynmoowarom u leh ya u khlawait ka jylla uwa da yakhun ha ka thma Kargil, u Capt. Keishing Clifford Nongrum uwa da yakhun wei da e u yei mynsien neibynta ka ri.
