Jowai : Kamwow pynkynmoo heini haka step yong ka 1 tarik u Thohlakhmi heipor kamwa 2:30 i step da em ki bru wa thmu u tooh ya ka ATM ka tnat ka bank SBI ka wa em ha Ladthadlaboh, harood u sarokbah NH 44.
Yeini da sakhi da u ma Samuel Suchiang wa ka kurim yong oo kiwa sah ha ka mala wa hapoh yong kani ka bank, wei dei mynsien wa khia da mih ki chalait yow pait yiwa jia heitæ yoo ki ya ki damok wa pyrchang ka u tooh ya ka ATM neini, hadien ini ka kurim u ma Suchiang da kiad ko wei da yut kini ki watooh neini i thaw.
Heiyatoh weini ynne ka sngi neiliang ki bor Pulit ka West Jaiñtia Hills, da kwah ki u e i sñiawngooh ya kini ki chi kurim kiwa da pyllait ya kani ka ATM nei chah tooh, da pynkup burom ya ki ha ka yalang wakhian hapoh i yung krehkaam u SP ka District u R Muthu.
Ha kani ka yalang da em u DSP u ma P Syiem, u Branch Manager ka SBI, u SI ma A. Wahlang, wa kini ki chikurim.
Neiliang kiwa klam ha kani ka yalang pynkupburom da yoh i klam na u President ka VDP ka Mookyrdup, u ma Wahlang, u Branch Manager ka SBI, u ma Syiem wa na u SP u R. Muthu.
Hei klam yong ki da e yaroh ki leh ya kini ki chi kurim yei mynsien wa chlur yong ki wei u R. Muthu won da kyntu u yaki wow pteiñ ya kam kini ki kaam neibynta i chongsuk chongsaiñ ka imlang sahlang wei kiwi leh toh u bood ki ya kam kani ka nongmuna.
Discussion about this post