Ynne ka sngi ka 12 tarik da man ko ka sngi wa ka Shillong Airport, Umroi, Ri-Bhoi District da ye ko u pdiang ya kiwa boon dooh ki bru nadooh wa sdang ya ka heiwa da em hadooh 404 ngut ki bru (Passengers) kiwa pynemkaam ya ka wei kat dang mih ki sngi ki bru wa pynemkaam ya ka dang boon ki.
Da kini ki 404 ngut da tam ko ya ki 395 ngut ini wa dadep heiwa ki bru wa hiar ha kani ka Airport ynne da em ki 214 ngut katwa kiwa mih won da em ki 190 ngut.
Ynne ka sngi ki lieñsuiñ wa da wan hiar (Arrival) ha kani ka Airport em ki 3 tylli na Kolkata, Itanagar wa na Impal katwa ki lieñsuiñ wa mih won (Departure) em ki 3 tylli kiwa lai cha Kolkata, Itanagar wa Imphal.
Kani ka Airport da man ko i kyrkhu wa khroo ya ka jylla heiwa ym emkaam de ki wow lai chadooh cha Lokpriya Gopinath Bordoloi Airport kawa em ha Guwahati hawa lai ki cha kiwi ki sorbah.
Chooh chooh da embynta bha ko heiyatoh wa ki bru kiwa em hapyrdi i kjut i chitom wei khamtam ha kini ki por wa dadep da yarap bha ko wow wanrah ya ki tiar wow yakhun pyrchah ya ka khlam COVID-19.
Hawa yaklam wa u Wyrta, neiliang u Director kani ka Airport, u Rishikant Bangwal da pyntip u wa ki chnong wa ki sor wa da pynyabi wa kani ka Airport kynthup ki ya ka Agartala, Imphal, Kolkata, Silchar, New Delhi wa Kolkata.
Da pyntip u leh wa katkam wa man katni da em le tylli kiwa pynhær lieñsuiñ wa pynemkaam ya kani ka karkhana wa kynthup ya ka Alliance Air, Fly Big wa ka Indigo.
Katkam wa man katni kani ka Airport ye ko wow pdiang (Arrival & Departure) 2 tylli ki lieñsuiñ ha ka chi kynta.
U Rishikant Bangwal da ong u leh wa katkam wa man katni, da kyrmen wa waroh ki nongbah ki jylla ka thaaiñ mihsngi daw ye u pynyabi wa ka Shillong Airport ha ini i tlang uni u snem.
