Ka khon khleh nong Thailand wa Canada ka 27 snem kawa tip pyrtuid kam ka Chalisa ‘Amanda’ Obdam da jop ko ya i naam Miss Universe Thailand 2020.
Ka Amanda kawa kha ha Phuket da jop ko ya 29 ngut kiwi kiwa chimbynta deiwa yoh leh yaka poisa wa Bt 3.5 Million kamjooh daw yoh ko wow mihkhmat yaka Thailand manda pynman yaka yakob miat kynthai ka Miss Universe.
Ka Amanda kawa man leh kam ka Model da dep jop ko yaka Miss Grand Rising Stars 2016 waka Miss Tourism Metropolitan International 2016.
Ka Amanda toh kawa da pyndep yei puræ yaka Bachelor Degree ha ka Business Administration deiwa leh Major ha Economics na University of Toronto, Canada, kawa pyn yapbiej ya kiwa bichaar deiwa stat ko wow klam kamjooh i miat kynthai.
Ya kani ka yakob da pynman ynnin ka 10 tarik ha True Icon Hall, Iconsiam ha Bangkok.
Ha i bynta wa hap wow e yei jubab, da kylli yaka kammon u mihkhmat ko yaka Thailand lada jop? Da jubab ko deiwa ong wa hanla da kha yaka kam ka Thai-Canadian tangwa ka toh ka kynthai Thai kawa paka kawa ye u pynyoo pyrthai iyi mut wow man kam ka nong thai iwa tip kam i ‘Thainess’.
Yei naam wa ar (1st Runner Up) da yoh ka Praveenar Singh kawa yoh pa da u nong India kawa na Chiang Mai Province katwa yeiwa le (2nd Runner Up) da yoh ka Punika Kulsoontornrut kawa na Prachuap Khiri Khan Province.
Ka ri Thailand da dep jop ko ya i naam Miss Universe arsien ha u snem 1965 wa ha u snem 1988.
