Jowai: Ki le ngut ki Kickboxer na ka jylla wa kynthup ya u Pynsuklang Sumer na Jatah-Mawkynrew, EKH u Hame Shaniah Suiam na Shangpung wa ka Lambhadaka Patlong na Jowai da pyndep ki ya ka WAKO International Kickboxing Referee Seminar wa pynman ha ka 3-6 tarik uni u bnai ha Lonavala Pune, Maharashtra.
U Hame Shaniah Suiam wa ka Lambhadaka Patlong da yoh ki ya ka Diploma Certificate yow ye ki u man kam ki WAKO International Judge & Referee ha ka Tatami Sports of Kickboxing katwa u Pynsuklang Sumer da pyndep u ya ka Ring Sports ka Kickboxing.
Ka Seminar da pynman ha ki arbynta ka Theory wa ka Practical Examination kawa pyllai da u Brian William Beck (Great Britain), Chairman Referee Committee Tatami Sports WAKO International Federation (IF) wa u Yury Lakhtikov (Estonia), Chairman Referee Committee Ring Sports WAKO International Federation (IF).
Ha kini ki le sngi da em 180 ngut kiwa wan chimbynta na kylleiñ ka ri wei da pynman ya ka da ka WAKO India Kickboxing Federation hapoh i yahkhmat u President WAKO India u Santosh K Agrawal hei yakrehlang wa ka Amateur Sports Kickboxing Maharashtra.
Ha ka 6 tarik ka Meghalaya State Kickboxing Association (MSKA) da tipmit ya ka da WAKO India.
Discussion about this post