Ka jylla Assam da yoh ko ya iwa nyngkong dooh wa yoh ya u khñiang Human Metapneumovirus (HMPV) ha iwi i khonboo wa dang 10 bnai iwa chah sumaar ha Assam Medical College & Hospital (AMCH) wa em ha Dibrugarh.
Ini i khonboo da wanrah ki cha thaw sumaar neidaw wa kyoh wei choh synrum i kamwa soo sngi wei hadien wa Test da chem wa yoh i ya u khñiang HMPV wei yeini da pyntikna da u Superintendent kani ka Hospital, u Dr. Dhrubajyoti Bhuyan.
Da pyntip u wa ini i khonboo ym em chitom i wei uni u khñiang ymtoh uwa phær uwa da jooh em hi wei ymtoh wow khuslai neibhah nadooh u snem 2014 da em 110 ngut kiwa yoh ya u HMPV du hapoh Dibrugarh District.
Ha Ahmedabad, Gujarat won da da em u bru uwa 80 snem uwa yoh ya uni u khñiang wei uni leh man u uwa dang chah sumaar wei ymtoh uwa dang dep wan na baar ri.
Ha Gujarat hi da em leh i khonboo wa 9 bnai wa yoh ya uni u khñiang iwa mut wa da em 5 ngut kiwa dadep yoh HMPV ha kani ka jylla.
Ka Puducherry leh da yoh ko ya uwa nynkong wa yoh ya uni u khñiang ha u khynnah wa 3 snem i rta wei da man u uwa da chait wei da yoh u wow mih Hospital ynnin ka sngi.
Discussion about this post