Heiyatoh wa i yap u Milas Khaii (41 snem) hadien wa chah dat ha ki bru wa da yahkhmat da u waheh chnong ka Wahsarang, East Jaiñtia Hills heiwa da booh leh ka FIR heiyatoh wa ini, neiliang ki pulit dadep ki wow kem ya 7 ngut ki bru.
Tangwa waroh kini ki 7 ngut da yoh ki ya ka jamin (Interim Bail) wa kyntup ya u waheh chnong ka Wahsarang, u Pius Khaii.
Kam wow pynkynmoo wa ha ka 25 tarik u December, u Milas Khaii wa u diah u, u Kamelus Khaii da chah dat ki ha yung ki heiwa u Milas da khlaad noh u ha ka 1 tarik uni u bnai.
Ki pulit da pyntip ki wa daw hap ki wow e ya ka Report cha ka yung bichaar ha ka 9 tarik uni u bnai wei daw yang ki kammon chim rai tangwa kini kiwa da yoh ya ka Interim Bail daw hap ki wow wan hajir hakhmat u Investigating Officer katkam ki kyndon wa da booh.
I takit ya kiwa sakhi leh da pyndep wei da chim yeiwa khana ki.
U Milas Khaii toh u pa yong ki 11 ngut ki khon wei katkam ka FIR da booh da ka khon u, da chah dat u da ka knor wa ki dieñ kamjooh u diah u, u Kamelus Khaii hadooh wa hap thiah Hospital ki.
Ini waroh da sdang i deiwa yahkhmat u Pius Khaii kam u waheh chnong wa u Tali Lamo kiwa da lai psiah cha yung u Milas Khaii yow thooh ya uwi u bru wa tip kam u Jur Tlang uwa da maham ya u waheh chnong tangwa heipor wa em ha ini i yung da mih noh i ya kajia heiwa da chah dat u Kamelus wa u Milas.
Puræ leh: Thooh ki pulit ka East Jaiñtia Hills ya u waheh chnong hadien wa yap uwi wa chah dat
Discussion about this post