Ka jylla Assam ha kani ka kynti da yoh wei da tipmit (Notified) sa sa ar tylli ki National Park hapoh ka jylla wei wa kini hapoh ka jylla kattu da em 7 tylli ki National Park. Kini ki National Park kynthup ki ya ka Raimona wa ka Dehing Patkai.
Chwa kini ki ar tylli ki National Park da em san tylli hapoh ka jylla ya kiwa tip kam ka Kaziranga, Manas, Dibru-Saikhowa, Nameri wa ka Rajiv Gandhi Orang National Park.
Ka Raimona National Park em ko ha Kokrajhar District ka Bodoland Territorial Region (BTR) wei heh ko kamwa 422 sqkm kawa em ya ki mrad wa ha rukom kiwa kynthup leh ya ki hati wa ki khla.
Ka Dehing Patkai National Park em ko ha Tinsukia wa Dibrugarh District ha i thaw wa heh 111 sqkm wei daw pynheh ya ka sa 123 sqkm. Ki mrad wa em hapoh yong ka kynthup ki ya ki khla-sim, hulu, hati wa kiwi kiwi.
Neiliang u Prakash Javedkar uwa man u montri ka sorkar pyrdi wa pait ya ka Environment, Forest & Climate Change ka sorkar pyrdi da e khublei u ya ka Assam wa da yoh ko sa ar tylli ki National Park iwa man kattu waroh 7 tylli wei man ko leh ka jylla kawa ar hei boon ki National Park hadien ka Andaman & Nicobar Island.
