Jowai: Ka Film Pnar wa tip kam ka Iung u Slaek kawa pynyoo pyrthai ha ka 27 u Naitung (April) 2017 da man ko ka Film Pnar wa samen wa chah jied ha ka Prag Cine Awards North East 2018 wow yakhun yei naam Best Actor Female, Best Director wa Best Film, i chah jied namo i yoh Nomination daw pynbna ya kiwa jop ha ka yalang wow pynman ha Guwahati ha ka 26 tarik u Naisan 2018.
Neiliang ka Director kani ka Film ka Simi Kongthiang da pyntip ko wa ka Iung u Slaek da man ko kawa nyngkong dooh na ki Film Pnar wa da yoh Nomination ha kani ka Prag Cine Awards North East wei na ki phlim wa riñ hapoh Meghalaya sa ka wi ka Film wa tip kam ka Gang of Northeast leh da yoh Nomination ko ha kini ki jooh ki bynta wa ka wi ka Film kawa na Sikkim wei waroh kiwa da thap pyrtuid ha kini ki le kyrdan da em ki 35 tylli.
Da pyntip ko leh wa ka Phelima Sumer kawa khut leh kam ka Kong Tiaw da yoh nomination ko ha ka kyrdan Best Actress Female.
Ha waroh ki kyrdan namo ki Category da em ki 31 tylli nadooh Best Choreography, Best Screenplay, Best Editing, Best Music Director wa kiwi kiwi.
Discussion about this post