Ka Jarain Government L.P. School kawa da sdang nadooh u snem 1910 da yoh ko ya ka yung skur wa thymme kawa da wan wai da u MLA ka Amlarem, u Lahkmen Rymbui uwa man leh u Montri ka chnat puræ puthi deiwa yoh yarap poisa na ka Special Rural Works Programme (SRWP) 2023–24 heiwa ha ka yalang da emlang u Jamshaphrang Pohtam (MDC, War Central), ka Deibor Patrecia Lytan (I/C SDSEO, Amlarem Sub-Division), ki waheh chnong, kiwa sikai wa ki khynnah skur kamjooh ki paidbah.
Ha ka yalang da yoh ki kyntien pdiang burom na u Chairman ka School Management Committee (SMC), heiwa da yoh i rwai na ki khynnah skur ka Jarain Government L.P. School wa ka Amwi Jarain U.P. School kamjooh ki klam na kiwa sikai skur.
U Lahkmen da pynsñiaw u yei kmen wa yoh u wai ya kani ka skur wa rim tam ha ka thaaiñ heiwa da kdaw u wa da pynemkaam Rs. 20 lak napoh ka Border Areas Development Programme (BADP) neibynta ka thaw puræ heiwa da e u sa Rs. 9 lak na ka MLA Scheme wow pynkhlan ya i emkaam ka skur.
Da pynbna u leh wa da booh bynta ka poisa Rs. 8-Rs. 14 lak hapoh ka PM-POSHAN (Mid-Day Meal) Scheme neibynta wow chna ya i kamra baam, ka um dih wa kiwi.
U Lahkmen da pyntip u wa da pynlait ya ka Work Order kawa Rs. 10 lak neibynta ka Seng Pynryumlang Ki Hyntha School wow pyndep u pynchna thymme ya kiwa da rim heiwa da yooluti leh wow yoh Rs. 2 klur hapoh ka BADP neibynta wow pynbha ya ki luti syngkieñ hapoh chnong Jarain wa ki chnong wa yajan.
Chooh chooh da kdaw u leh ya chiboon ki kaam pynroi heiwa da ong u wa daw khut ya u Montri Rangbah ka jylla wow wan cha Jarain ha ka Golden Jubilee Celebration yong ka Amlarem Sub-Division ha ka 12 tarik u Khonchonglad 2025, neibynta wow wai wei wow yoo bniah ya ki kaam pynroi wa har rukom hadooh i kreh ya ka Hospital.
Da kdaw u leh wa kini ki kaam toh kiwa yatoh wa ki Scheme ka sorkar pyrdi kam ka Pradhan Mantri Adi Adarsh Gram Yojana (PMAAGY) wa PM Janjatiya Unnat Gram Abhiyan (PM-JUGA), kiwa e Rs. 20.39 lak cha man ka chnong tre ri neibynta wow chna ya ki skur, ki thaw sumaar, um baam wa ki sarok.
U Lahkmen da kyntu u ya ka Village Defence Party (VDP) wa ki manbei manpa wow man kiwa husiar wow sumaar ya ki khynnah pyrchah na ki kaam pyrchah aiñ deiwa pynsñiaw leh yei kmen wa ka kpær wa thung ka skur da ye wow khieh hadooh 20 kilo u toh wa rep ki.
Da pynkut ya ka yalang da ki kyntien khublei na ka Imonmi Suting (Assistant Teacher) wa ki rwai na ki khynnah.
Discussion about this post