U Montri wa pait ya ka chnat Civil Defence & Home Guards, u Brenning A Sangma ynne da wan u wow wai ya ka yung krehkaam wa thymme ka Jowai Civil Defence & Home Guards deiwa emlang u Montri ka chnat Health and Family Welfare, u Wailadmiki Shylla.
Kani ka Office Building wa thymme toh kawa em ha Hali Synna, Mihmyntdu, Jowai wei da chna ka hei lut wa Rs. 9 klur.
U Brenning hawa e yei klam da yaroh u yei miat wei stat i rukom pynwandur ya kani ka yung kawa daw yarap ya ki Home Guards & Civil Defence wow kreh rap bha chooh chooh ki neibhah ki man ki kam kitæ kiwa nyngkong wow poi hawa jia iwon iwon yow yarap pynlait im ya ki bru.
Da khana u leh wa ka chnat daw pynkylla ko ya ki ar tylli ki Battalion cha ki ar tylli ki Company ka State Disaster Response Force (SDRF) yow pynkhlan yow ye ki wow leh yei kaam deiwa smat.
U Waildmiki hawa e yei klam da kynmoo u yei por ka khlam COVID-19 kammon wa yarap kiwa kreh ka Civil Defence & Home Guards ha kiwa boon ki kaam heiwa kiwa boon ym tip ki yeini wei ini i pynyoh ya ka Building wa thymme pynyoo ko wa ka sorkar leh kwah ko wow pynmiat pynbha chooh chooh yei e chakri.
Da ong u leh wa emkaam wow sikai ya waroh kiwa chong chnong kammon wow leh ki manda jia iwon iwon i mynsoo.
U MK Sangma, Director of Civil Defence, Meghalaya, da e khublei u ya ki tre yung wa da jooh chimwai wa em ha Dongmihsngi, Ladthadlaboh heiwa ka chnat da krehkaam ko na kani ka thaw da boon boon snem.
Da pyntip u leh wa ki 477 ngut kiwa dang dep thung kreh daw sdang ka Training ki nadooh ka 24 tarik u November uni u snem ha Shillong, Jowai wa Tura. Wei da em leh i tyrwa wow pynmih sa 233 ki kreh wa man kam ki Permanent Post.
Da thung leh 708 ngut ki Part Time Border Wing Home Volunteer manda chna ya ki ar tylli ki SDRF Battalion. Wei ini u man ko neibynta ki thaw khappood kiwa em 30 Km na u pood wa ka Bangladesh.
Chooh chooh da khana u wa ka Revenue Department da mynjur ko Rs. 2 klur yow thied ya ki tiar ki tar wa thymme ki wow yarap hawa thooh ya ki bru. Wei hapoh ka Central Scheme daw e Training 360 ngut ki Home Guard Volunteers wa ki Warden na ka 22 tarik uni u bnai wei hadien ini ki Master Trainer na Tripura wa Mizoram leh daw yoh Training ki ha ka General Training Institute.
Discussion about this post