Ynne ka sngi u Symbood Montri Rangbah ka jylla u Prestone Tynsong, chirup wa u Montri ki kaam Suwari u Sniawbhalang Dhar, u MLA ka Jowai, u Wailadmiki Shylla, ki sahep ka chnat PWD wa ki waheh chnong da wai ki 7 tylli ki mooyurim yong ki sarok waphær waphær yong ki chnong wa em hapoh ka Jowai Constituency ha ka yalang wa da pynman ha madan Mihmyntdu.
Kini ki mooyurim kynthup ki ya i siang psiang ya u sarok ha Mihmyntdu wa jrong 6.677 Km wa kynjoh T. 5. klur, u sarok psiang (Internal Road) ka chnong Sabahmuswang wa jrong 2.77 km ha i lut wa T. 2 klur, ka yingkieñ wa pynyabi ya u sarok na Wahnangbah cha Thomas Jones Synod College wa jrong 10M ha i lut wa T. 80 lak.
Da wai leh ya u mooyurim wow chna pynmiat ya ki sarok ka Jowai wa jrong 33 Km ha i lut wa T. 28 klur wa da yoh lyngba ka World Bank, u sarok na Demthring hadooh Sohmynting wa jrong 22.30 km ha i lut wa T. 45 klur, i siang psiang ya u sarok ha chnong Niriang wa jrong 2.08 km ha i lut wa T. 1.20 klur wa i chna pynmiat ya u sarok Madan Thadlaskein cha Mutong ha i lut wa T. 2.13 klur.
Waroh kani ka poisa dapoi ko T. 84,14,37,000.
Ynne ka sngi hawa e yei klam neiliang u CEM ka JHADC, u Thombor Shiwat da yaroh u ya u MLA ka Jowai wa dei kreh chitom yong oo da ye u wow wanrah ya ki kaam pynroi ha ka thaaiñ wei da sakhi yeini toh lyngba ki mooyurim wa da booh ynne ka sngi.
Chooh chooh da ong u wa kani ka sorkar wa katni da chimkhia ko ya ki kaam wa sahteiñ nadooh nachwa khamtam ya ki kaam wow pynbait ya u pood ka jylla waka Assam.
U Wailadmiki Shylla ynne da ong u wa neidaw wymye u kiar da pynkhreh wow booh sa 3-4 tylli ki mooyurim tangwa da e khublei u ya u Prestone Tynsong uwa boonsien ym kyntait u.
Da ong u wa hapoh ka Jowai Constituency awjan waroh ki chnong kiwa da yoh ya ki sarok psiang, wei chwa wow man MLA u da yoo u wa ki sarok ki chnong da man ki kiwa da sih khlem chna pynmiat namo Repair.
Chooh chooh da ong u wa ha Jowai da chna ya ki dooid narood sarok khnang wow ye u yada ya ki sarok neibhah manda ym em dooid ki sarok leh ym neh ki wei ki Pipe umkor leh u pynlai ya ki neini.
Da pyntip u leh wa i kreh pynmiat ya u sarok Jowai Bypass na Thadlaskein cha Soomer ha i lut wa T. 14 klur, wei i kreh u sdang noh i ha ki tayaw wow wan.
U Wailadmiki da ong u leh wa dap u dei sñiawkmen neibhah ha i por wa tbian hapyrdi wa wan ka khlam COVID-19 ha ki ar snem da ye wow leh chiboon ki kaam pynroi deiwa kyrpaad leh ya ki paidbah wow kyrchaan biang ya oo wow ye u wow kreh chooh neibynta ki paidbah.
U Sniawbhalang Dhar ynne da ong u wa kini ki moo wa booh ynne kynthup ki leh ya ki kreh wa dadep wei kiwa daw sdang ya ki kreh leh kamjooh.
Da ong u wa ka sorkar warim tang kat ya ka poisa wow chna pynmiat ya ki sarok leh ym em ko tangwa dei kreh chitom u MLA wa u Dy. CM da yoh ya ka poisa wow siang psiang ya waroh u sarok ha Jowai.
Heijooh i por da ong u wa kani ka sorkar toh kawa neh slem dooh hanla synrop lang ko wa ki palat 7-8 tylli ki Party wa ki MLA samen.
U Prestone Tynsong da ong u ka sien wa nyngkong ya oo wow wai u hadooh 7 tylli ki mooyurim wei ini toh nei kreh chitom u MLA ka Jowai Constituency uwa da wan yachem bait wa oo uwa da wan paan yarap neibynta ki paidbah ka Constituency.
Da ong u wa da booh thong wow pyndep lut ya ki kreh waroh hapoh u snem 2024.
Chooh chooh da ong u wa na ki sor khian wow pynmiat ya ki, emkaam wow wanrah ya ki Scheme wa har rukom khamtam ha Jowai wei hadien ymtip de ki bru ya ka neibhah wa da kylla dur ko.
Hajrong i chah wohñia wa booh mooyurim kani ka sorkar katni, da ong u wa toh du ki bru wa atnood donhi khamtam ha ki Social Media.
Ha kani ka sngi da pynphooh leh ya ka da ki chaad wa ki rwai.
