15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Yoh ka Jowai Diocese ya ki ar ngut ki Lyndohsohblei wa thymme ha ka lehkmen dap 100 snem ka Balang Katholik Mihmyntdu

0 Comments

Jowai: Ka Balang Katholik Mihmyntdu, Parish Jowai ynne ka sngi da pynkut ko yei lehkmen dap 100 snem wa poi ka niam hapoh ka chnong wei da pykhroo chooh chooh ya kani ka sngi da i pynkyntang Lyngdohsohblei ya ki ar ngut ki Deacon u Ebormitre Henry Lamare wa u Deacon James Eleazer Bareh wei da em leh ka Procession Eucharist.

Ya ka yaseiñ da pynman ha madan Mookynphad, Mihmyntdu wei da wan emlang u Most Rev. Bishop Victor Lyngdoh, u Sniawbhalang Dhar, Minister C&RD, Soil & Water wa u MLA ka Jowai Constituency u Wailadmiki Shylla deilang wa ki waheh niam, ki Father, ki Sister wa kiwi kiwi kiwa da chah khut sñiawbha.

Advertisement ad1

Kajak chaphang u Deacon Ebormitre Henry Lamare Lyngdoh wa thymme ka Jowai Diocese, oo toh u khon u (L) Ïeiñskhem Bamon wa ka Valeria Lamare wei da kha ya oo ha ka 20-09-1984 ha Mission Compound, Jowai wei da em ki 7 ngut chi payu tangwa iwi da khlaad noh i.

U Deacon Ebormitri man u leh u ksu u (L) Riangmon Laloo uwa man uwa ngait ka niam Katholik wa nyngkong dooh na Jowai uwa da psiah balang ha u snem 1929 wei da e pyrtuid wa thymme ya oo kam u Simon.

U Deacon Ebormitre da sdang u ya ka puræ puthi na St. Mary Mazzarello Secondary School hadooh Class IV wei da pteiñ won u sa ha Marian Hiill Secondary School, Jowai, da pyndep u ya ka Matric na St. Paul’s Apostolic School, Upper Shillong, ya ka Class XII (Science) na Kiang Nangbah Govt. College, Jowai wei da pteiñ u sa ka B.Sc ha kani ka jooh ka thaw puræ.

U Deacon Ebormitre kam u khynroo ha u snem 2005 da man u kam u President wa nyngkong ka Seng Samla Katholik Jowai-Sohmynting Sub-District wa u Joint Vice-President yong ka Seng Samla Katholik Parish Jowai.

Ya i puræ Theology da pyndep u na Oriens Theological College, Shillong.

Kajak chaphang u Deacon James Eleazar Bareh u Lyngdoh wa thymme ka Jowai Diocese, oo toh u khon u Wanbor Lato wa ka Adelinda Bareh wei da kha ya oo ha ka 14-02-1987 ha Ladthadlaboh, Jowai wei emki 6 ngut chi payu.

U Deacon James da puræ u ha Tome Memorial Secondary School nadooh Class A khian hadooh Class X wei na kani ka thaw puræ da mih i thrang wow man Lyngdohsohblei. Kamtæ da lai u cha ka General Vocation Camp ha St. Paul’s Seminary wei da jied u ya ka syllok Salvatorian. Ha u snem 2010 da mih u na ka yasyllok Salvatorian wei dei yarap u Rt. Rev Vincent Kympar, DD u Bishop yong ka Jowai Diocese da pynyasoh u wa ka seiñ tre-ri (Diocesan).

Ha kani ka sngi pynman leh ya ka lai Procession kawa da wan chimbynta da ki 16 tylli ki Parish.

Kajak Chaphang ka Balang Katholik Mihmyntdu

Ya u symbe wa nyngkong ka Balang Katholik ha ka chnong Mihmyntdu da thung ha u snem 1916 da ki khon ki kti ka chnong wa kynthup ya u Kyrchan Phawa, u Gregor Phawa wa ka Cordina Phawa.  Ya u Kyrchan da yah luti ya oo cha ka niam Katholik da u pa yong oo u uwa na ka chnong Nangbah wei da psiah niam u ha u snem 1916. Ha uni u jooh u snem da pynbaptist leh sa ya u Gregor Phawa wa ka Cordina Phawa kiwa man ki khon kha mynrap (twins) ka kong Ling Phawa wa u Ksan Shylla.

Ya ka pynbaptist da leh ha ka chnong Mookyndeng ka thaw wa wan nyngkong dooh ka niam Katholic hapoh ri-loom Jaiñtia.

Ya ka pynbaptist da leh da u Phadar Grignardy ha ka 27-04-17.

Ha u snem 1934 dei yarap u Fr. Elias Tome ka balang da yoh ko u thied ya i thaw ha Umpyrtuh heidor T. 60 naka Cicilia Kasar wei ha uni u jooh u snem da kyrriah ya ka yungmane na Riatslayia cha ini i thaw wei da chna ya i yung mane da u siej wa ki phlang hei thaw wa yieñ wa yung skur ka balang wa em katni.

Ha u snem 1962 u Fr. H. Fantin, u Parish Priest yong ka Jowai da wan u wow e Mass ha Mihmyntdu wei ha ini i por da yoh u sakhi wa ka yung mane toh kawa da jæd wei kawa khynnia. Ha u snem wa bood hapoh i yahkhmat u Michael Dkhar wa kiwa parakristan da chna ya ka yungmane wa thymme da i yung tin harood u Sarokbah NH-44.

Ya kani ka yungmane da chim rai wow chna thymme biang ya ka ha u snem 1988 hadien wa da mynjur lang u Parish Priest u Fr. Henry Manner hei yakrehlang ki dkhot ka balang kiwa da noh kyllooid mynsien ya ka poisa da chna ya ka yungmane wei da lai bait ko khamtam heipor yong Parish Priest u Fr. Semeon Sungoh.

Da chimpor leh hadooh 10 snem wow pyndep chna ya ka yungmane wei da kyrkhu ya ka yung mane thymme da u Fr. Semeon Sungoh ha ka 28-12-98.

Previous
Next

0 Comments

Leave a Reply