theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

Yoh ka Mawlynnong yei naam Best Eco Tourism Destination ha India

Ka chnong Mawlynnong ka chnong kawa paawnaam kam ka chnong wa khooid tam ha ka dawbah Asia waroh kawi, ha kani ka kynti kani ka chnong da yoh rah ko ya ka khusnaam Silver Award kam ka ‘Best Eco Tourism Destination’ hapoh ka ri.

Ya kani ka khusnaam da e kti ha kiwa mihkhmat ka sorkar ha ya yalang wa tip pyrtuid kam ka Outlook Traveller Awards-2022 wa da pynman ha New Delhi ini wa dep.

Ya kiwa yoh khusnaam da jied da ka kynhun wa kynthup ya ki bru wa stat wa ki bru chemphang ha ini i liang na kylleiñ ka ri. Ya kani ka khusnaam da saam da u Montri ka chnat Tourism & Culture & Development of North-eastern Region of India u G. Kishan Reddy.

Ha kani ka saam khusnaam da tyrwa (Nominate) leh yei pyrtuid u sarok na Shillong cha Sohra kam kawi na ki luti wa miat tam namo ka “Best Scenic Route Roads” ha India.

Hawa klam hajrong ini i yoh khusnaam, u Montri Rangbah ka jylla, u Conrad K Sangma da ong u wa i em ki thaw uiñke suwari em ko i bynta wa kongsan tam yow pynku yei yoh i kot haka jylla. “Ka sorkar jylla da kreh chitom bha ko ha kini ki soo snem wa da lai yow pynku ya ka jylla cha ki kyrdan wa rap khroo haka pyrthai lyngba i em ki thaw uiñke suwari wa paawnaam. I yoh rah ya kani ka khusnaam na ka Outlook Traveller toh ka sakhi ya ini i kreh chitom ka sorkar ha kini ki soo snem wa da lai. Nga ngait wei kyrmen O wa ka jylla Meghalaya daw yoh ko yei naam wa nyngkong hei em ki thaw wa miat yow lai uiñke suwari ym du ha India tangwa wot ha ka parthai hi waroh kawi.”

Chooh chooh da ong u wow pynbiang yei emkaam wow chna ya ki thaw uiñke suwari ha ka jylla, ka sorkar wa katni da booh thong ko hadooh T. 1600 klur neibynta wow pynku ya ki kaam uiñke suwari ha ka jylla.

Ka Outlook Traveller Award toh kawa pait yei bha wa i paka ka thaw wa chah jied man-u-snem na ki bynta ki khusnaam waphær waphær. Ha u snem 2015 ka sorkar pyrdi leh da tipmit ko ya ka Mawlynnong kam ka Role Model Village yow bood kiwi wow man kam ka.

Share this:
Previous

Balei ba ka ishu ki nongdiemadan ka long kaba kongsan ban їatai bad їakren da baroh? 

Next

Da pynthymme yei dor phñiang charak ha West Jaiñtia Hills