Ka President ka India, ka Droupadi Murmu ynne da saam ko ya ka National Florence Nightingale Award neibynta u snem 2022 wa u snem 2023 cha ki Nurse wa em 30 ngut kiwa ngut 15 ngut chi snem ha Rashtrapati Bhavan, Delhi.
Kawi na kini wa yoh toh kawa na Meghalaya kawa pyrtuid Reliance Pyrngap kawa da yoh ya ka National Florence Nightingale Award neibynta u snem 2022.
Ka Reliance Pyrngap toh kawa da man kam ka Nurse ANM wa LHV la 35 snem. Da jooh kreh ko ha Saipung Primary Health Centre wei katni da kreh ko ha Sutnga Community Health Centre, East Jaiñtia Hills.
Da man ko leh kawa pliah bha hei kaam yong ka hawa e yei chakri ya kiwa chong chnong. I yahkhmat wei kreh chitom yong ka wei sñiawthooh yeiwa emkaam ki paidbah da ye wow pyn-im ya kiwa boon ki manbei wa kha khon. Na ki por cha ki por da lai pynpliah ko ya idæ deiwa chimbynta ha ki CNE Program hapoh ka ri, jylla wa ka District. Ka Reliance Pyrngap man ko leh kawa da yoh yaroh bha ha ki paidbah kamjooh leh ki bor District.
Hawa yaklam wa kiwa thoh khubor, ka Reliance Pyrngap da pynsñiaw ko yei kmen wow yoh ya kani ka khusnaam deiwa ong wa nadooh wa sdang da e ko 100% hawa kreh ko nadooh wa sdang hadooh wa kut u snem.
Da khana ko leh wa ka pynchlur ko ya ki para wakreh yow ye ki leh wow yoh yei tipmit hawa e yei chakri ya ka imlang sahlang.
Da pynsñiaw ko leh yei sñiawngooh ya ka sorkar India yeiwa jied ki ya ka wow yoh ya kani ka khusnaam.
Ka National Florence Nightingale Award toh kawa da sdang da ka Ministry of Health and Family Welfare ka sorkar India ha u snem 1973 yow tipmit yei kaam wa bha ki Nurse.
