Ynne ka sngi kam chibynta yong ka World Environment Day, ka Seiñraij Jowai da yoh ko wow wai ya ka Khnap Thangbru Yap Mynsoo namo ka Kambel Shullai Eco Friendly Crematorium kawa em ha Khloo Paiung (Seiñraij Reserve Groove) heiwa u Dr. Wanweiroy Kharlukhi da man u kam u kongsan.
Hadien wa wai ya ka Khnap Thangbru da em ka yalang wa tbian ha Yung Dorbar ka Seiñraij Jowai ha Loompyrdi Iongpiah heiwa da yoh ki kyntien pdiang burom na u Hercules Toi uwa man u President ka Seiñraij Jowai.
U Arwotki Sumer uwa man u General Secretary ka Seiñraij hawa e i klam da ong u wa ynne man ko ka sngi wow sahkynmoo ya ki khon ka Seiñraij heiwa da yoh u wai ya ka Khnap Thangbru neibynta ki khon ka Niamtre kiwa yap nei mynsoo kam i tyrrah kari wa kiwi kiwi wym poi pyrkhat.
Da pyntip u wa ya kani ka khnap da chna deiwa yoh yarap poisa Rs. 20 lak na ka MP Scheme wa da e u Dr. Kharlukhi yong u snem 2023-24 wei ya kani ka Scheme da pynbna wow e yarap ha ka 30-12-23.
Da kynmoo u leh ya u (L) Kambel Shullai uwa da thooh da boon tylli ki snem kammon wow pynwandur ya ka Khnap Thangbru wow pynsuk ya ka pateiñ wow wan deiwa ye wow pynneh ya ki dieñ ki praw.
U Arwotki da kynmoo u wa chwa wow em ka Khnap Thangbru chwa u 2001 hawa pyndep ya ya niam thang ka riñ da hap wow deiñ ya ar tylli ki dieñ heh tangwa katni uwi u dieñ kseh da ye wow pyndep ya ka niam thang neibynta ki 50 ngut ki bru.
Neiliang u Dr. Kharlukhi kam u kongsan da ong u wa jooh sñiawsarong u ya ki waheh wasian wa da seiñ ya ka chnong yong i neibhah wa man ki kiwa stat bha neibhah wa man ki kiwa chynna jngai bha wot hadooh i synchaar paidbah.
Da ong u wa u Syiem nachwa man u kam u Syiem cha dkhar donhi tangwa manda ku u cha ki loom cheini hap ap u ya i sur ki 12 Dolloi.
Heiyatoh wow pynneh pynsah ya ka ramaw, ki waheh da booh ki ya ki Khloo Blai Khloo Kyntang wow yada ya ka kamjooh i choh doh ha ki um ki wah yeiwa da leh du chisien chisnem donhi.
Da kyntu u leh wow pynemkaam noh ya ka sla neibhah wa ym du wow yada ko ya ka ramaw tangwa pynim ko leh ya ki bru wa rep wa dai ya ki sla.
Ha kani ka sngi da yoh leh i ngoohblai na u Wandao Lakiang, u Maji ka Raij Jowai; ki kyntien khublei na u Wyraiki Kharbuki, Asst. General Secretary ka Seiñraij wa i rwai na ki khynroo khyllood ka Seiñraij.
Ynne kam chibynta yong ka sngi wow yada ya ka rymaw, ka Seiñraij Jowai da pynman ko ya i thung dieñ ha Biar Ka Blai ha kjat u Loom Mookhai.
Kam wow pynknymoo wa kawa nyngkong dooh ka Khnap Thangbru Yap Mynsoo ka Seiñraij Jowai toh kawa em ha Riatturiem.
Discussion about this post