Ka Meghalaya Forest Department da ye ko u yakhun pyrchah yei khayi tooh ya ki mar wa ki mrad khloo hapoh ka Nongpoh Wildlife Range wa haap hapoh ka Khasi Hills Wildlife Division ka Ri-Bhoi District.
Ha ka 18 tarik u July hadien wa yoh ya ka yutip wa tikna da ka Wildlife Crime Control Bureau (WCCB) wa em kiwa khayi tooh ya ki mar ha u sarok Nongpoh–Umden Road, neiliang ka Nongpoh Wildlife Range da pynman ko yei lai kynreh ha u sarok Umwang heiwa da yoh ya ki bñiat hati Asiatic Elephant (Elephas maximus), wei da kem ya ki ar ngut wa kynthup ya u Tras Khymdeit wa u Wilshon Khymdeit, kiwa na Ri-Bhoi District wei da pynngat ya ki hapoh ka Wild Life (Protection) Act, 1972 heiwa da Register ya ka Case ha Nongpoh Wildlife Range, wei i takit dang man iwa lai chaphrang.
Ha ka 2 tarik uni u bani won ha chnong Shakhoikuna, Ri Bhoi District, neiliang ka Nongpoh Wildlife Range da chem ya ko ar muna Plastic wa em ki snieh u rbai (Pangolin Scales) wei da kem ya u Benedick Khymdeit uwa na Ri Bhoi District wa u Rupai Ingti uwa na Kamrup District, Assam katwa uwi won da yut u na ini i thaw.
Ya kini ki snieh da chimkti katkam ki kyndon ka Wild Life (Protection) Act, 1972 wei da Register ya ka Case hapoh ka Nongpoh Wildlife Range, katwa i takit dang lai i chaphrang.
Ya ki hati wa rbai da yada hapoh ka Wild Life (Protection) Act, 1972 wei i khayi ya ki man i pyrchah ya ka aiñ.
Discussion about this post