Hadien wa da tip bniah na ka chnat Excise ka Assam, neilang ka chnat Excise na Ri-Bhoi ha ka 2 tarik heipor kamwa 1:30 i sngi da pynman ko yei kynreh ha ar tylli ki thaw kiwa da suba wa em i chna kiad pyrchah aiñ wei da chem ya kawi ka thaw wa leh yeini ha Shillong Bypass hajan Umiam.
Ha ini i lai kynreh, kawi na ki thaw toh kawa em marjan waka Shillong Bypass ha Umiam heiwa da chem ya ka thaw chna kiad pyrchah aiñ wei da yoh leh wow kem ya chiboon ki tiar ki tar wa pynemkaam yow chna kiad, katwa kawi won ka thaw da chem ha Industrial Complex Umiam wa da suba toh ka thaw chna kiad pyrchah aiñ tangwa ym em yoh u kem iyi iyi.
Ini i lai kynrehlang ka chnat Excise ka Assam wa Meghalaya, toh hadien wa yoh kem ya kawi ka Truck wa em Number AS-11-AC-9144 ha Khanapara wei lyngba i yoh kem ya kani ka Truck da pynman wow lai kynreh ya katai ka thaw chna kiad ha Shillong Bypass.
Hawa pyntip chaphang ini ynne ka sngi, neiliang u Superintendent ka chnat Excise na Ri Bhoi, u R.C. Lyngdoh, da pyntikna u wa toh sakhiat wei da chem leh ya kani ka thaw chna kiad pyrchah aiñ ha Shillong Bypass hajan Umiam wei da ye wow leh yeini deiwa ya krehlang ka chnat Excise wa ki bor pulit na Umiam Police Station.
Da khana u wa ki tiar wa da yoh u kem toh nadooh ki kor ki bor kiwa pynemkaam yow chna kiad nadooh ki Blending Tags, Storage Tank, Capping Machine, Production Lines, ki Flavouring wa Colouring Agents deilang ka Counterfeit Hologram yong ka Assam wa Meghalaya.
Da ong leh wa na ini i lai kynreh, da yoh wow kem ya ki kiad wa dadep chna nadooh ka OC, OC Blue, Royal Stag wa McDowell’s No.1 kiwa dapoi 23,000 klong. Najrong kini da yoh leh wow kem ya ki Label ka Excise yong ka Meghalaya wa Assam, deilang ki klong wa thylli wa ki synduk kot wa song kiad.
Chooh chooh da pyntip wym pu em yoh kem ya kiwon kiwon kiwa emkti ha ini i kaam wei ka takit dang lai ko chakhmat.
Discussion about this post