Ka seiñ FKJGP Khliehriat Circle da lai hiar ko cha ka Police Check Point yong ka Ladrymbai Police Outpost kawa da pynyieñ ha Kongong, East Jaiñtia Hills heiwa da yoh ko leh wow ksoh ya kawi ka kari Pick-up wa kit masi kawa suba toh kawa thmu wow pynpoi ya kini ki masi cha Bangladesh.
Ka seiñ da ong ko wym yohsa u wan da ka ha kani ka thaw neibhah kini ki kari toh kiwa yoh laitlan bha u pynlai ya ki masi cha Bangladesh wei hadien wa ksoh ka da lai e kti cha kani ka Police Check Point yow leh ki yeiwa emkaam neibhah kani ka kari ym em ko ki kot ki sla.
Ka seiñ da beiñ ko leh ya ki pulit wym chimkhia ki hajrong ini heiwa da em i su poisa ha kani ka Check Point kamwa Rs. 500 chi kari deiwa pynbaad leh wa ki bor ka aiñ da yada ki ya kini ki kaam pyrchah aiñ wa kit ya kini mar.
Najrong itæ ka seiñ da ong ko wa ki pulit da ong ki wym ye u pyntikna wa kini ki mar toh kiwa lai cha Bangladesh.
Ka seiñ won da ong ko wa lada pait tang yei rukom kit ya kini ki masi da man ko pyrchah ya ka aiñ Prevention of Cruelty to Animals Act wei ym du itæ kini kiwa kit ya kini ki masi ym em ki leh ki kot ki sla wow pynyoo ha kawon ka yaaw u lai pynhaap ya kini ki masi.
Chooh chooh ka seiñ da ong ko wa kini kiwa kit ya kini ki mar toh kiwa man kam kiwa yahluti ya ki Bangladeshi wow psiah chapoh ka jylla wei lada ki pulit leh ya kyrsumlang ha kini ki kaam pyrchah aiñ, ki paidbah ya kiyi won u chaniah ki?
Discussion about this post