July 19, 2020

Yoh kem ka JSU War Jaiñtia Circle ya u kwai Supari wa challan tooh na Bangladesh cha India

Advertisement ad1

Ka JSU War Jaiñtia Circle ynne ka 19 tarik, da yoh ko wow kem ya ki mar wa challan tooh na Bangladesh kiwa da thmu wow pynpsiah cha ki yaw ha India.

Ka seiñ ha i yahkhmat u President u Eddy Kery Pohtam wa u Dewan Bareh da chem ki ya ki 50 churia ki kwai Supari ha rood ka wah Lakroh hajan ka chnong Lakroh kawa em hajan ka chnong Muktapur. Kamtæ ka seiñ da booh ko da ka ujor FIR cha ka thanat yong ka Muktapur PP ha ka jooh ka sngi wei ki pulit leh da wan kem noh ki ya kini ki mar.

Ka seiñ da pynsñiaw ko yei pyrchah joor yei khayi pyrchah ya ka aiñ ha ka khappood India-Bangladesh khamtam ha kini ki por wa em ka khlam COVID-19. Ka seiñ da ban joor ko wa ini i khayi dang lai bha i chakhmat deiwa ong leh wa dang em i yachem hapyrdi kiwa khayi pyrchah yaka aiñ ka India wa Bangladesh.

Ka seiñ da ong ko leh wa kini kiwa khayi ym kheiñ ki ya i ood pyrchah kiwa chong chnong ka thaaiñ Ri War Jaiñtia kiwa dang pyrchah joor ya ini i khayi wei da booh i hei maa ya ki paidbah na kani ka khlam.

Ka seiñ da pynsñiaw ko leh yei wym myntoi ini i yaleh wa kani ka khlam da ki laad waphær waphær kam ki Lockdown, lane deiwa khang yaka Export/Import lyngba ka Land Custom ha Tamabil khlem da ye wow kdoh u khoom ya ini i khayi pyrchah ya ka aiñ ha ki thaaiñ khappood.

Ka seiñ da kyrpaad joor ko wa neiliang ki BSF, ki pulit wa ki bor chnong wow pynjoor ki yei sonteri. Deiwa ong leh wa ym joor ka khayi pyrchah aiñ lada khlan wei pynrkhiñ joor ki pulit wa ki chnong ha ki laad ki luti waphær waphær nadooh na ki khappood, ka luti nadooh na Muktapur næ Dawki wa kiwi kiwi chadooh cha Amlarem, Jowai lane Shillong lane ha kiwon kiwon ki thaw wa em ki bor pulit.

Kamtæ ka seiñ da beiñ joor ko ya ini leh kiwa khayi pyrchah yaka aiñ ki wym kheiñ ya i yap i im ka jaitbru ha kam ini i por.