Ki dkhot yong ka KSU Ranikor Circle ynne ka sngi heipor kamwa 1:00 waje da yoh ki wow kem ya 24 ngut ki dkhar ha Ranikor kiwa dang wan ku na ka thaaiñ khappood na ka chnong Maheshkhola, South West Khasi Hills District kawa man ka chnong wa em ha khappood wa ka ri Bangladesh.
Ka seiñ da ksoh ko ya kini ki bru neidaw wa ye ki wow man kiwa na Bangladeshi kiwa wan psiah tooh kam kiwa kreh mylla wei hadien wa chem wym em ki ya ki kot ki sla kiwa biang, da e kti noh cha ki pulit yong ka Ranikor Police Station yow leh ya iwa emkaam.
Ka seiñ da kyntu ko ya ki BSF, ya ki pulit kamjooh ki bor District yong ka South West Khasi Hills District wa toh u chimkhia ki hajrong ini i wan kam kini ki bru ki wym toh ki tre ri khamtam ha ki thaaiñ khappood neibhah wa suba joor wa ye ki wow man kiwa na Bangladesh kiwa da wan ku hadien wa mih i kulmar ha kini ki por.
Ka KSU da maham ko leh ya ki Contractor wa kiwa e kreh wym toh u pyrkhat ki du yei yoh nong samen deiwa khut da ki Bangladeshi wow wan kreh neibhah toh u husiar ya mih iyi iyi hadien ha bood. Da maham leh ya kitu kiwa yarap ya ki wym toh ki tre ri wow wan psiah kam kiwa mylla wei lada chem daw leh ka seiñ yeiwa emkaam.
Discussion about this post