Ka KSU Khliehriat Unit ynne i janmiet da yoh ko wow ksoh ya kawi ka kari Alto 800 wa em ya u Number AS-11-5670 kawa kit ya kiwa da suba toh ki nong Bangladesh kiwa da wanpoi lyngba ka chnong Kuliang.
Hawa kylli takit ya ki, ym ye ki wow jubab wot tang chi kyntien wei ym ye ki leh wow pynyoo ya ki kot ki sla kiwa tikna wow pynsakhiat toh ki nong India, da ong ka seiñ.
Da pynchrai leh ya ka seiñ wa kini ki bru da thmu ki wow pynbaam poisa yaki dkhot ka seiñ khnang wow lait ki wei ini da pynchit kylla ya ki dkhot ka seiñ.
Ya kani ka kari da yah da uwi u Khasi wei katkam wa tip toh uwa jooh leh kam kini ki kaam wow lai booh ya ki baar jylla deiwa kular wa ki daw lait bait ki wei da man u leh kam u dalal.
Hadien ini da pyntip noh cha ka Khliehriat Police Station wei da rah ya ki chapoh thanat yow leh yeiwa emkaam.
Ka seiñ da ong ko wa u pteiñ ko wow pait wow chare yow lait kiwa na baar wow psiah tooh chapoh ka Bri U Ynñiawtrep wei da maham wow khyrwit bait ya ki bru kiwa jooh myllien wow man dalal khlem maap.
