Ka VDP yong ka Dorbar Chnong Muktapur ynne i step synyaw ka 19 tarik da yoh kem ki ya kawi ka kari Bolero (Pick-Up) kawa kit ya u kwai (Supari) deiwa thmu wow challan cha Assam.
Haka ujor FIR wa da booh ha Muktapur PP da ong wa kani ka kari wa em ya u number ML04-C-5805 toh kawa thmu wow challan pyrchah yaka aiñ ya ki mar wei da yoh kem yaka hapoh u pood u ang ka chnong Muktapur heiwa da em hapoh u tre kari uwa tip pyrtuid kam u Donbok Buam deilang wa u January Shylla wa ki 3 ngut kiwi kiwa bood ya ki.
Da ong chooh chooh wa heipor wa ki VDP da pynsangeh ki ya katai ka kari deiwa jai jai, ki bru wa em hapoh yong katai ka kari da yaleh ki wow pyrchah wei wow tba kti pathan yaki VDP ka chnong. Wei neidaw wa duna paaid ki VDP, da pyntip cha ki para VDP wow wan yarap lang khnang wow ye u ksoh ya kitai ki bru.
Katkam wa pyntip ki VDP wa ki mar kiwa wan kit kamwa 50 churia toh kiwa poi na Bangladesh lyngba ka wah Lakroh kiwa da thmu wow challan tooh cha Assam.
Ka VDP da ong ko wa kini ki bru da tyngkheiñ ki leh yaka aiñ kawa khang pyrchah ya ki bru wa khayi mar tooh waka Bangladesh wei ha i jooh i por da tyngkheiñ leh ya ki kyndon wow yada na u COVID-19 deiwa yachem wa ki nong Bangladesh hawa chimkti ya kini ki mar wei da tyngkheiñ leh yaka hukum wa em ka Night Curfew wa da pynkrehkaam katni.
