Shillong: Ynnin ka janmiet heipor kamwa 7 waje, ki pulit ka tnat Custom da yoh ki wow kem ya ar ngut ki bru wei da khyrrup na ki hadooh 19.7 kilo u drug dawai kuli (Methamphetamine) wa chong dor hadooh T.19.7 klur, ya uni u drug da khyrrup na ka thaaiñ Kiling, Khanapara, Ri-Bhoi District. Ki ar ngut kiwa da chah kem toh kiwa tip pyrtuid kam u Letminlun Khongsai (27 snem) uwa man uwi na ki snar khayi drugs wa da thooh da ki pulit wa ya uwi uwa tip kam u Sailesh Singh (44 snem) uwa yah ya ka kari wa kit ya u drugs kiwa toh na jylla Manipur.
Hawa yaklam wa kiwa pathai khubor u Deputy Commissioner ka Custom, u Isac R Kharkongor da pyntip u wa hadien wa yoh yutip wa yei joor i lai Manipur uni u snar khayi drugs neiliang ka Custom da pynman ki ya i boodien ya uni uwa khayi drugs.
Da pyntip wa ha ka 26 tarik uni u bnai da wan u da ka airplane na Imphal cha Assam yow wan chim ya uni u drugs kiwa da pynpoi ha ka 25 tarik na kawi ka thaw ha Kiling wei ki pulit da boodien ki oo nadooh wa hiar airplane u hadooh wa poi u cha Kiling wow lai chim ya uni u drug.
Chooh chooh da pyntip leh wa da em ki pulit custom kiwa da booddien ya kani ka kari kawa kit ya uni u drug wei heipor 7:30 i janmiet da kem ya kani ka kari wei hadien wa kynreh da yoh wow kem ya u drugs uwa da murieh ha i bynta wa ha khmat ka kari wei waroh da em 90 tylli ki yusong wei waroh kini ki dawai da em ki 197,000 tylli.
U Kharkongor da pyntip u wa hadien i takit ya u Khongsai, da pyntip u wa ya uni u drug da thmu wow chalan cha ri Bangladesh wei wow pynlai lyngba kani ka jylla na ka thaaiñ West Garo Hills khappood wa ka Bangladesh.
Hawa jubab lada em ki bru na kani ka jylla kiwa emkti lang ha kani ka kaam, neiliang u Kharkongor da ong u wa hadooh katni ym pu ye u ong wei dang takit chwa ya ki bru wa em ha Kiling kiwa yarap wow murieh ya uni u drug.
Chooh chooh da pyntip u wa da pynngat katkam ka NDPS Act, 1985, wei da bichaar ya ki ynne ka sngi da ka Kasari.
Discussion about this post