Yoh kem ki pulit ka East Jaiñtia yei Heroin wa chongdor Rs. 5.5 klur

Ki pulit ka East Jaiñtia Hills District ynne i step da yoh ki wow kem 48 tylli ki khieh sabon wa em i drug Heroin iwa chongdor Rs. 5.5 klur na ki ar tylli ki kari wa wanrah da ki ar ngut.

Ya kini da yoh wow kem hadien wa ki pulit da tip tikna ki wa daw em ar tylli ki kari kamai Sumo kiwa daw wan na Mizoram kiwa daw kit lang wa kini ki mar wa man pyrchah aiñ.

Kamtæ ki pulit ka Umtyra Check Gate deilang wa ki pulit ka Khliehriat PS da pynsangeh kari ki ha Nongsning hapoh i pait u Banraplang Jyrwa, Additional SP, East Jaiñtia Hills wei heipor 8:30 i step dapoi kini ki kari wei da ksoh ya ki.

Hawa kynreh ya ka kari wa nyngkong kawa em Number ML-05M-1597 deiwa emlang kiwa sakhi, da chem ya 4 tylli ki khieh sabon wa em i lakhit rong umsoh wa khia 43.33 gms iwa da pyntikna toh i Heroin hadien wa dep Test katwa na kawi won ka Sumo kawa em Number MZ-01K-3872 da chem 44 tylli ki khieh sabon wa em 516.43 gm i Heroin.

Heiyatoh wa ini da em ya arngut kitæ u Lorence Zomuanpuia (32 snem) uwa sah ha Assam Bazar, ARC, Shillong wa u Lalmalsawa (36 snem) uwa ne Huntar Veng, Aizawl, Mizoram.

Related posts

Yoh kem ka DRI 29 Kg i ksiar wa ka poisa wa Rs. 2.90 klur na Delhi wa Agartala | Emkti kiwa na Bangladesh wa na Dubai

January 7, 2026

Na pchem yung chah tooh sa kawi ka Scooty ha Jowai

January 5, 2026

Ini i Heroin waroh toh iwa khia waroh 599.76 gms wei da yoh leh wow kem ya ka poisa wa Rs. 2,200 wa ar tylli ki Mobile Phone na kini ki arngut.

Ya kini da pynngat hapoh ka aiñ NDPS wei da booh ya ka takit ha Khliehriat PS wei dang booddien yow chem ya kiwi de kiwa emkti ha ini i kaam.