Jowai: Ki pulit ka Jiribam District Police (JDP) da yoh kem ki ya ki ar ngut kiwa khayi drug wei na ki da yoh kem 50,000 tylli ki dawa kuli wa tip kam ki WY Tablet kiwa chong dor T. 35 lakh deilang waka poisa wa T. 23,000 na ki.
U SP ka JDP, u M. Mubi Singh da pyntip u wa hadien wa yoh yutip ki kawa tikna wa em kiwa khayi drug wa lai luti naka sarokbah NH-37, waroh ki Police Outposts ka JDP da phah ya ki wow pynjoor ya ka sylli ya ki kari wa lai luti nadooh ka 8 tarik uni u bnai. Da yarap lang ya kani ka kaam da ki Commando, ka Anti-Drug Cell hei emlang ki pulit kynthai.
Heipor wa pynsangeh ya kawi ka kari Bolero rong lieh wa em ya u number MN 04-A-1751 wa wan na Imphal hajan ka chnong Leingangpokpi, neidaw wa rap phær i rukom yah ya ka kari, heiwa ya uwa yah kari da tip kam u Lamneichong Haokip (34 snem), wei da emlang leh ka kurim u ka Thangkhaopao Haokip kiwa na ka chnong Chikim, Tengnoupal District kiwa sah katni ha Moreh Heinoumakhong Leikai, Ward no. VII wei da em leh u Thangjam Naoba Meitei, (29 snem), uwa sah ha Moreh Heinoumakhong Leikai, Ward no. VII.
U SP da pyntip u wa hawa kynra ya kani ka kari da chem ya 5 tylli ki muna Plastic wa em ki chana badam tangwa manda wai ya kini ki yusong da chem sa ya ki yusong rong stem wa 10 tylli ki yusong rong suiñ bneiñ wa em 200 tylli ki WY Tablets heiwa waroh da poi kini ki dawai kuli 50,000 tylli kiwa chong dor T. 35 lakh wei da yoh leh na ki T. 23,000.
Hawa pynman ya ka takit, kiwa chah kem da phla ki wa ya kini ki drug da poi ki chapoh ka ri India lyngba ka chnong Moreh wei da thmu wow kit ya ki cha Assam.
Discussion about this post