Ynne i step synyaw ka 12 tarik, ki pulit ka Ummulong Beat House hawa pynman yei pynsangeh kari da yoo ki ya kawi ka Truck kawa em ya u Number RJ-10GB-1424 da sangeh ko chwa wow poi cha ka thaw pynsangeh kari (Check Point) wei da hiar arngut ki bru wei da yut ki na ini i thaw.
Hawa yoo yeini, ki pulit da kdong ki ya kini tangwa neidaw wa doom da yoh ki wow yut wei da ieh ki ya ka kari chadien.
Ya kani ka kari da psiah chapoh da ki pulit heipor 1:30 i step wei da chem toh kawa da sma bhang bha wa wan nadien wa em ki mar wa kit ko.
Kamtæ da pyntip cha ki pulit ka ANTF kiwa da wan wow kynreh ya kani ka Truck heiwa da chem 80 yusong u bhang kiwa da khia waroh 1168.182 kilo wei uwa chongdor T. 3.5 klur.
Neiliang u DGP ka jylla da kular wow e khusnaam ya kini ki pulit wa da bniah hanla i por man i hei step synyaw.
