Ka Anti Narcotics Task Force (ANTF) ka West Garo Hills hadien wa da yoh yutip ko deiwa tikna wa em uwi u bru wa dai drugs wa daw wan u na Assam cha Meghalaya lyngba Phulbari-Rajabala-Hallidayganj Road, kamtæ deiwa yahkhmat u SDPO ka Dadenggre, wa kynthup lang ya u IC Rajabala POP, IC Selsella, da booh ki yaki thaw pynsangeh kari ha kiwa boon ki thaw.
Ha ini i kynreh kari da yoh wow kem ya uwi uwa 32 snem i rta najan ka chnong Rajabala ynnin i step ka 22 tarik uwa da wan daka thuk-thuk kawa da pynsangeh hajan Rajabala.
Na uni da chem ya 9263 tylli ki dawai YABA Tablets (Methamphetamine) kiwa khia 967.55 Gram.
Ka takit dang lai ko chakhmat yow chem sa ya kiwi kiwa emkti ha kani ka kaam.
Neiliang ki pulit da kyrpaad ki yaki paidbah, kiwa chong chnong wow ya krehlang waki pulit yow yaleh pyrchah ya i drugs wei lada tip iyi iyi chaphang kiwa dai wa khayi drugs wow pyntip cha ki pulit.
