Jowai: U Superintendent of Police ka West Jaiñtia Hills u L. Syiem da pyntip u wa haka 8 tarik uni u bnai heipor 2:30 i sngi, ki pulit ka Dawki PCP hadien wa yoh yutip ki wa tikna da yoh ki wow kem ya le ngut ki nong Nigeria kiwa psiah tooh chapoh ka ri India.
Kini ki le ngut ki nong Nigeria toh kiwa tip pyrtuid kam u Okafor Kelechukwu (22 snem) wa u Okolie Desmond (24 snem) wa u Obilom Raymond (33 snem) kiwa psiah chapoh ka ri India lyngba ka Bangladesh.
Hawa takit ki pulit da chem ki wa kini ki le ngut toh kiwa em ki Passport wa biang katwa ka VISA yong ki toh kawa thok kamtæ da pyngat yaki hapoh ka aiñ Foreigners Act waka Passport Act wei ka takit dang lai ko cha khmat.
Neiliang u SP da kyrpaad u ya ki paidbah wow wan cha khmat lada tip ki ya ki bru wa yarap ha kam kini ki kaam wow yarap yaki baar ri wow psiah tooh ki chapoh ka ri wei ya i pyrtuid ki bru wa yarap ya ki pulit daw murieh ya ki.
Discussion about this post