Ha i janmiet ka 29-10-21 hadien wa tip ki pulit deiwa tikna wa em uwa dai drug uwa na Manipur uwa lai cha Shillong deiwa rah lang wa i drug ha ka kari wa em ya u Number Assam wei ya ini i drug daw e ha uwi uwa dai drug ha Shillong.
Kamtæ ki pulit ANTF ka East Khasi Hills deilang wa ki pulit ka Mawlai da booh ki yei thaw wow pynsangeh kari ha Mawiong Rim heiwa da yoh wow kem ya u T. Ginlienthang wa u Lamminthang Paongam.
Ya u bru wa toh u chimkti ya ini i drug leh da yoh wow kem pyn na ini i jooh i thaw heipor wa wan u wow chim ya ki mar.
Hawa kynreh ya ka kari da chem ya 100 tylli ki tadong sabon wa song yei drug Heroin kiwa da kynset ha kiwa boon ki bynta ka kari.
Ka takit da chem ko wa ini i drug toh iwa da wanrah na Myanmar yow dai ha Shillong.
Heiyatoh wa ini da pynngat ya kiwa emkti hapoh ka aiñ Narcotics Drugs & Psychotropics Substances Act, 1985 wei ya ka mukotduma da booh ha ka Mawlai Police Station.
