Hadien wa da tip ki pulit wa em i chah dawa poisa ki dukan wa em ha Police Bazar wa ha Iewduh, ynne ki pulit ka Special Cell ka East Khasi Hills Police da yang khap ki ya kini ki bru wei da yoh ki wow kem ya 4 ngut na Police Bazar kiwa da lai e chithi dawa poisa na kawi ka dukan.
Heiyatoh wa ini, ki pulit da ujor hi ki pyn da ki hi pyrchah ya kini ki bru ha Sadar Police Station ya kini ki kaam dawa poisa ki.
Ki pulit da yoh ki leh wow kem na kini ki bru ya 3 tylli ki chithi dawa poisa hei pyrtuid ka seiñ Hynniewtrep People Defense Alliance (HPDA) wa ar tylli ki Receipt Book kani hi ka seiñ.
Da yoh leh wow kem ya ar tylli ki Donation Receipt Slip yong ka seiñ United Khasi Movement (UKM), ar tylli ki Donation Reciept ka seiñ Federation of Khasi United People (FKUP) wa ar tylli ki Donation Slip ka seiñ Confederation of Meghalaya People (CMP).
Da kem leh ya kawi ka Counterfoil Reciept Slip ka seiñ Khun Hynniewtrep Youth Council (KHYC) wa ar tylli ki Donation Reciept ka Hynniewtrep Youth Region (HYR).
Da yoh leh wow kem ya kawi ka Scooty Aprilla wa em Number ML-05Q-9828 wa 4 tylli ki Mobile Phone.
Neiliang u SP (City), u Vivek Syiem da pyntip u wa ka takit dang lai ko chakhmat yow tip heiwon de ki dukan lai dawa poisa kini ki bru yow ye u kem ya kiwi de kiwa emkti ha ini i kaam wei na kini kiwa chah kem da em kiwa da jooh chah kem ha ki pulit nachwa.
Da kyntu leh ya ki tre dukan, kiwa khayi pateiñ wow pyntip ki cha ki pulit lada em kam kini kiwa wan dawa poisa.
Discussion about this post