Ki pulit ka East Jaiñtia Hills District da yoh ki wow kem ya ar ngut kiwa khayi drug wa wan na Silchar yow lai cha Shillong da kawi ka kari Maruti Zen wa em ya u Number WB-02P-2867 ynne ka sngi.
Ki pulit da ksoh ki ya kani ka kari ha Umtyra Check Post hadien wa da em wa pyntip cha ki wa daw em kiwa khayi drug kiwa daw lai luti, kamtæ deiwa ya krehlang wa ki pulit ka ANTF, ki pulit ka Umtyra deilang wa ki pulit Anti-Infiltration deiwa yahkhmat u Addl. SP u Banraplang Jyrwa wa u DSP Jason Myrom da yoh wow kem ya kini ki arngut deiwa thooh ya ki hadooh 15 kynta wei da chimpor toh neidaw wa joor sahkut ki kari ha Malidor neiliang ka Assam.
Hadien wa chem ya kani ka kari wa em kini ki arngut, da kynreh ya ki wei da chem 6 tadong sabon wa em i drug Heroin wa khia 72 gram wa 17 sla (Strip) i dawai kuli Nitrazapam wa da murieh da song bha kini ki arngut hei doh i pran yong ki deiwa kynset cha khap patlun.
Da yoh leh wow kem ya ar tylli ki Mobile Phone wei ya ka takit da pynman da ka Khliehriat Police Station wei da pyngat ya kiwa chah kem hapoh ka aiñ NDPS Act.
Dang pynman leh ya ka takit yow tip kiyi kiwi kiwa da emkti wow pynlai yaw ya ini i drug.
Kiwa chah kem toh kiwa tip kam u Heirtami Dkhar (29 snem) uwa na Madanpatien Ialong, WJH wa u Rajen Pale (25 snem) uwa na Lumpyrtuh Mihmyntdu, WJH.
