Ka United Democratic Party da dawa ko na u President ka BJP wa kamjooh na u Montri Rangbah ka jylla wow leh iyi iyi ya u Sanbor Shullai uwa da wohnia yei klam u President ka UDP, u Metbah Lyngdoh ha ka yalang wa da wan ka kyrtong President ka NDA, kawa da pynman ynnin ka sngi ha Orchid, Umiam.
U General Secretary ka UDP, u Jemino Mawthoh da khana u wa ka Party da chong yalang jhan ko ynne hajrong i leh u Sanbor uwa toh u Montri wa u MLA ka BJP, da beiñ joor leh deiwa dawa wa u Montri Rangbah wa ka seiñ BJP wow leh iyi ya uni u MLA uwa pyndooh burom ya u President ka UDP uwa man leh u Lamphang hapoh ka Yungdorbar Chna Aiñ iwa da ktah joor bha ya ka burom yong ka jylla.
Katkam wa ong u Jemino, u Sanbor da pyndooh burom u ya u Metbah deiwa wohnia katwa u Metbah dang klam u ya iwa ktah ya ka jylla wa ki paidbah, khamtam hawa yatoh wa i chah lehbeiñ ki khian paaid wa ki Christan, wei katwa dang pynsñiawthooh yeiwa emkaam ka jylla hawa yatoh wow tipmit ya ka ktien Khasi wa Garo ha ka 8th Schedule wei wow pynkrehkaam ya ka ILP.
