Ki pulit ka Ri-Bhoi hadien wa da yoh yutip wa da em ka kari kiwa kit ya ki tiar tympdung wa thmu wow lai lyngba u sarokbah na Ri-Bhoi, hajrong ini neiliang ki pulit ynne i step heipor kamwa 5 waje da yoh ki wow ksoh ya kawi ka kari wa kit ya ki tiar tympdung wei da yoh leh wow kem ya ki ar ngut ki bru kiwa emkti ha ini i kaam chalan pyrchah ya ka aiñ ya ki tiar tympdung.
Ya kini ki tiar da yoh wow kem da ki pulit ka Byrnihat Police Outpost kiwa da yang khap ya katai ka kari nadooh i por 2 waje i step synyaw heiwa heipor 5 waje da yoh wow kem ya katai ka kari wa em ya u Number AS-01LC-1112 heiwa da chem ya kini ki tiar napoh katai ka kari wei da kem leh ya ar ngut ki bru.
U Superintendent of Police ka Ri-Bhoi, u Giri Prasad da ong u wa ini i yoh kem ya kini ki bru wa kit ya kitai ki tiar tympdung toh hadien wa da yoh yutip chwa wa da wan nadooh na Jaiñtia Hills wei i thmu toh wow lai pynhaap cha Rani Bazar ha Guwahati.
Ki tiar wa da yoh kem toh 2 song ki Aluminum Electronic Detonators kiwa em 25 tylli ha kawi kawi ka yusong wa 12 synduk u Neo Gel (Gelatin Sticks).
U SP da ong u wa ym pu ye wow khana yei pyrtuid kitai ki ar ngut kiwa da chah kem neidaw wa dang pynman yei takit yow chem ya kiwi leh kiwa emkti ha ini i kaam.
