Sa iwi wa da jia wa da pynsihnaam chooh chooh ya ka India kam ka thaw wym em man chngaaiñ ya ki kynthai, ar ngut kiwa yaleh Cricket ka Australia kiwa em ha Indore, Madhya Pradesh kam chibynta ka ICC Women’s World Cup da chah tba ki ha u bru wa wan da kawi ka thuk-thuk hei step ka 23 tarik.
Ini da jia i ha ka thaaiñ Khajrana Road heipor wa dang lai ki cha kawi ka Café hadien wa mih napoh ka Radission Blu Hotel heiwa u bru wa emkti wow leh yeini da tip kam u Aqeel Khan.
Katkam wa khana u Sub-Inspector, u Nidhi Raghuvanshi, kini ki ar ngut kiwa yaleh Cricket ka Australia da mih ki napoh ka Hotel heipor kamwa 11:00 waje i step yow lai cha kawi ka Café heiwa da wan uwi u bru da ka thuk-thuk wa bood ki nadien wei da tba u ya kawi na ki chwa wow yut u.
Da ye wow chemdien ya uni uwa emkti lyngba ki CCTV wei da em leh kiwa em chajan kiwa kynmoo yei Number kani ka thuk-thuk.
Ya uni u bru da kem hei janmiet ka 25 tarik wei da pynngat oo hapoh ka Section 74 wa 78 ka BNS wei da chem leh wa uni u bru toh u wym jooh em tyngkhooh wa ka aiñ nachwa.
Discussion about this post