Ki pulit ka Delhi da yoh ki wow kem ya uwi u bru uwa da chim kabu ya ki bru deiwa chna yaki Account wa thok ha Facebook uwa paan yarap poisa deiwa e daw wa toh emkaam poisa jhan (Emergency) wei ya uni u bru da tip kam u Munnalal Mavasi, wei da kem ya oo da yung u na Satna ha Madhya Pradesh.
Ini i leh uni u bru da wanrah hakhmat ki pulit ka Delhi Lodhi Colony Police Station da uwi u bru uwa da pyntip wa da em u bru wa uwa da chna yaka Facebook Account thok deiwa pynemkaam yei pyrtuid yong oo deilang wa ki dur u wa kiwi kiwi kam i chnong wa sah u.
Hadien ini, uni u bru da phah Message u cha ki lok yong uni u bru, kiwa ha yung ha sem deiwa paan yarap poisa deiwa kam wa em iwa jia ya oo kamtæ emkaam poisa jhan u.
Deiwa ya krehlang ka Lodhi Colony Police Station wa ka Delhi Police Cyber Cell da sdang ki wow booddien ya kani ka kaam wei da ye wow chem tre ya kani ka Facebook Account cha ka chnong Satna ha Madhya Pradesh.
Hawa lai yachem ki pulit wa u Munnalal Mavasi, da pyrchang u wow yah bakla yaki tangwa hadien da phla u ya ini iwa leh u deiwa chna ya ki Facebook Account hei pyrtuid yong kiwi yow thok ya ki bru deiwa paan poisa deiwa kam wa emkaam bha u wow yoh yarap.
U Mavasi toh uwa sah ha Satna uwa da pyndep yaka Graduation kamjooh uwa em yaka Diploma ha Veterinary Sciences. Da kreh u kam u Veterinarian ha i chnong u chwa wow kreh u waka International Marketing Corporation (IMC). Hadien ini, u Munnalal Mavasi da yoh u ya ini i buit wow thok u chukor ya ki bru yow im deiwa pahooh.
Ki pulit da chem ki leh yaki kot ki sla wa yatoh wa waki Bank Account wa ki Passbook na i yung u Mavasi ha Satna. Da khana u leh yaki pulit ka Delhi wa ya kani ka poisa wa da yoh u da pynemkaam ha i seiñ khih Hotel.
