Shillong: Kattu katni sngi hadien wa ki pulit da yoh ki wow kem chiboon ka poisa na kawi ka kari ha Mawlai na u sarok-bah Guwahati-Shillong, ka Superintendent of Police (SP) East Khasi Hills, ka Claudia Lyngwa da pyntip ko wa ka poisa kawa da yohkem da poi ko hadoh T. 59 lak.
Kam wow kdaw heini wa ha ka 18 tarik uni u bnai, ki pulit ka East Khasi Hills da yoh khyrrup ki chiboon ka poisa na kawi ka kari tangwa ha i tai i por ki pulit da kyntait ki wow batai bniah hajrong ini i yoh kem cha ki laad pathai khubor neidaw wa daw ktah ko yaka takit yong ki.
Ka SP East Khasi Hills, ka Claudia Lyngwa, da pyntip ko wa da yoh kem ki T. 59 lak na kawi ka kri wei da kem ya soo ngut ki bru wa kynthup kawi ka kynthai.
“Hadien ka takit, da chem wa kini kiwa chah kem toh kiwa khayi tooh ya i ksiar wei ya i ksiar wa em ki da dep dai cha ki ar ngut ki bru, uwi na Nowgong District wa uwi won na Guwahati”, da ong ka SP.
Da ong ko wa ki pulit da pyntip ki cha ki pulit ka Nawgong hajrong ini wa jia wei da kem ya uwi u bru da ki pulit deilang wa i ksiar wa 450 Gram.
“Ha ka sngi wa bood i da sñiawthooh i wa kani ka kaam ym embynta ko ha ki kaam khayi drugs namo wa kiwi ki kaam sih tangwa man bait ko du ka kaam khayi tooh,” da ong ko.
Ka Claudia Lyngwa da ong ko wa ki pulit da rah ki cha yung bichaar ya ki le ngut ki bru kiwa na Meghalaya haka 19 tarik katwa ya uwi da e kti cha ka jylla Assam.
Da pyntip wa da dep thoh cha ka yung bichaar wow e kti yaka mukotduma cha ka chnat Custom wei da chimkti ki ya kani ka mukotduma.
Discussion about this post