Ka Public Health Engineering (PHE) Department, West Jaintia Hills District, ynne da pynman ko yei lehkmen ya ka Jal Arpan Diwas, Stop Diarrhoea Campaign deilang ka Har Ghar Jal Declaration wei saam Certification ha Sohkha Mission, deiwa sakhi ki sahep ka PHE, ki waheh chnong, ki dkhot ka Village Water & Sanitation Committee (VWSC), kiwa sikai, ki khynnah skur wa kiwi de.
Ka Har Ghar Jal Certificate da saam cha ka Sohkha Mission, ka Sohkha Shnong, Sohkha Phlang wa ka Sohkha Model Mathmat. Kini ki Certificate toh yow tipmit ya kini ki chnong hapoh ka Har Ghar Jal deiwa pynpoi umkor namo ka Household Tap Connection, deilang ka umdih wa miat, i paitbniah leh wa poi ka um kawa khooid da ka chnong chirup wow pyntikna wa neh iwa da pynchna.
Hawa klam hajrong ka Jal Arpan Diwas, u Sokima Najiar, Executive Engineer, PHE da khana u chaphang i pynpoi um da kawa hoi u dih ha thaaiñ Sohkha hapoh ka Sohkha Combined Water Supply Scheme kawa nyngkong da booh mang poisa ₹81 lak ha u snem 2006 wei hadien won da pynku hapoh ka Jal Jeevan Mission ha u snem 2020 cha ₹1.31 klur.
Hapoh ini da em 196 tylli ki manyung ka Sohkha Mission, Sohkha Shnong wa Sohkha Phlang kiwa da yoh umdih najrong wa kylliang ya ki Pipe wa da sih ha kini ki le tylli ki chnong.
Kani ka Jal Arpan Diwas man ko leh kam chibynta wow e kti yeiwa dadep pynchna cha ki bor chnong wow pait wow sumaar ki wei neiliang u Executive Engineer da kyntu u ya ki VWSC deilang kiwa chong chnong wow yada ya ini waroh yow neh ki kamwa da booh da mang.
Da ong u leh wa lada jia wa chah ktah ki Pipe neidaw i tih mar pohkhyndaw wow wan pyntip ki wut-wut.
Ka Daiamonlang Ksoo, SDO, PHE, da khana ko wa ka Jal Jeevan Mission i thong ko toh wow pynpoi umkor cha ki chnong wa em cha palatsor ym du cha ki yung ki sem tangwa cha ki skur, ki thaw sumaar wa ki Anganwadi Centre. Wei katkam ki kyndon toh u pynpoi 55 litre ka um chi sngi neibynta uwi u bru.
Discussion about this post