Ka Jaintia Network Society ha ka 31 tarik u Naisaphra da yoh ko u pynman ya i sikai wa chi sngi hajrong ka phang kammon u booh ya ki symbe jhoor wei kamjooh leh i saam ya ki sboh wa tip kam ki Organic namo ki sboh wa da chna da iwa em chwa ha ka rymaw cha ki warep ha ka chnong Mupliang.
Hachwa u sdang ya kani ka e sikai da em i yalang wa tbian ha kawa da pynlai da ka A. Kyndait kawa man ka dkhot ka Jaintia Network Society, ki kyntein pdiang sñiawbha da u waheh chnong yong ka chnong Mupliang, u P. Phawa, ki kyntien batai chaphang ka Jaintia Network Society da e da ka P. Lamare.
Da yoh leh ya i pynsñiawthooh chaphang ki kreh mano ki Project wa pynkrehkaam ha ka chnong Mupliang daka S. Nartiang.
U Dawan Lyngdoh, MDC ka Mynsngat hei klam yong oo kam u kongsan cha kiwa wan chah sikai da pynsñiaw u yei emkaam yong ki warep iwa khlem pynemkaam dawai yow lait na i kjut wa boonjait. Da pynchlur u leh wow pynemkaam da ki sboh wa yoh soodong na ka bei rymaw kawa man leh i rukom rep kiwa ki bru nadooh tynde da jooh rep ki.
Da ong haroh u wa hawa pait ya ki bru waheh yong i da yoh ki ya ki rta wa jrong neidaw wa ki baam ki dih, ki jhoor ki jhep wa baam ki toh kiwa lait na kitæ ki dawai wa boonjait. Kamtæ da e mynsien u ya kiwa wan chah sikai wow myllien noh ki u rep heitæ i rukom wa lait na i pynemkaam ya ki sboh dawai wa ktah ya u bru.
Ha kani ka sngi da emlang leh wa ka H. Suchiang kawa man leh kam ka warep kawa da ku bha chakhmat na ka chong Mulum Laskein Block kawa man leh kam kawa sikai ya kiwa emlang ha kani ka sngi.
Hadien kani ka yalang da yoh leh u saam ya ki symbe wa ki sboh cha ki warep ha kawa da saam da u kongsan.
Da yoh ya ki ktien khublei da ka C. Dkhar kawa man leh kam ka Field Co-Ordinator yong kani ka Project.
